തിരുവനന്തപുരം: കൊവിഡ് 19(കൊറോണ) എന്ന മഹാമാരി പടരുന്ന സാഹചര്യത്തില്‍ മുന്‍കരുതലിനായി സംസ്ഥാനത്ത് നിരീക്ഷണവും മറ്റും ശക്തമാണെന്ന് സര്‍ക്കാര്‍ പറുയുമ്പോഴും പോലീസ് മേധാവി ലോകനാഥ് ബഹ്‌റക്ക് മാത്രം ഈ നിബന്ധനകള്‍ ബാധകമല്ലെന്നത് ആശങ്ക ഉയര്‍ത്തുന്നു. മാര്‍ച്ച് മൂന്ന് മുതല്‍ അഞ്ച് വരെ ഡിജിപി ബ്രിട്ടണ്‍ പര്യടനം നടത്തിയിരുന്നു. എന്നാല്‍ തിരിച്ച് നാട്ടിലെത്തിയ ഡിജിപിയെ നിരീക്ഷണത്തില്‍ വച്ചില്ല. ഇതിന് പുറമേ രോഗബാധിത മേഖലയില്‍ നിന്നു മടങ്ങിയെത്തിയ ബഹ്റ നിരവധി പരിപാടികളില്‍ പങ്കെടുത്തതും ആശങ്ക പടര്‍ത്തുന്നു.
മാര്‍ച്ച് നാല് മുതല്‍ യൂണിവേഴ്സല്‍ സ്‌ക്രീനിംഗ് ആരംഭിച്ചതായി കേന്ദ്ര ആരോഗ്യമന്ത്രാലയം അറിയിച്ചിട്ടുണ്ട്. ഇതനുസരിച്ച് കേരളത്തില്‍ ഉള്‍പ്പെടെ എത്തിയിട്ടുള്ള എല്ലാ വിദേശപൗരന്മാരും, വിദേശത്ത് നിന്ന് തിരികെയെത്തിയ ഇന്ത്യക്കാരും നിരീക്ഷണത്തിലായിരിക്കണം. എല്ലാവര്‍ക്കും ബാധകമായ ഈ നിബന്ധന ബ്രിട്ടണ്‍പര്യടനം കഴിഞ്ഞ് മടങ്ങിയെത്തിയ പൊലിസ് മേധാവിക്കു ബാധകമാക്കിയോ എന്ന് സര്‍ക്കാര്‍ വ്യക്തമാക്കണമെന്ന തരത്തിലും പല കോണില്‍ നിന്ന് വിമര്‍ശനം ഉയരുന്നുണ്ട്.
ഇറ്റലിയില്‍നിന്നു തിരികെയെത്തിയ റാന്നിയിലെ കുടുംബം യാതൊരുവിധ മുന്നറിയിപ്പോ സൗകര്യങ്ങളോ ഏര്‍പ്പെടുത്താതിരുന്ന നെടുമ്പാശേരി വിമാനത്താവളത്തില്‍ നിന്ന് നാട്ടിലേക്കു പോയപ്പോള്‍ അവര്‍ നാടിനെ വഞ്ചിച്ചുവെന്നാണ് ആരോഗ്യമന്ത്രിയും സര്‍ക്കാരും ആവര്‍ത്തിച്ചുകൊണ്ടിരിക്കുന്നത്. അങ്ങനെയെങ്കില്‍ ഡിജിപിയും നാടിനെ വഞ്ചിക്കുകയല്ലേ എന്ന സംശയവും ഉയരുന്നുണ്ട്.
രോഘവുമായി ബന്ധപ്പെട്ട് സാമൂഹ്യബോധവും കടമയും പ്രകടിപ്പിക്കാത്തവര്‍ക്കെതിരെ കര്‍ശന നടപടി സ്വീകരിക്കുമെന്നാണ് വാര്‍ത്താ സമ്മേളനങ്ങളില്‍ മുഖ്യമന്ത്രിയും ആരോഗ്യ മന്ത്രിയും പറയുന്നത്. അങ്ങനെയെങ്കില്‍ ഡിജിപിയെ നിരീക്ഷിക്കാന്‍ എന്ത് നടപടിയാണ് സര്‍ക്കാര്‍ സ്വീകരിച്ചിരിക്കുന്നതെന്ന കാര്യത്തില്‍ വ്യക്തത വരേണ്ടതുണ്ട്.
10,000ലേറെപ്പേര്‍ക്കാണ് ഇംഗ്ലണ്ടില്‍ രോഗബാധ സംശയിക്കുന്നത്. എണ്ണൂറോളം പേര്‍ക്ക് സ്ഥിരീകരിച്ചുകഴിഞ്ഞു. അവിടത്തെ ആരോഗ്യമന്ത്രിക്ക് കൊവിഡ് 19 പിടിപെട്ടു. പ്രധാനമന്ത്രിയുടെ വസതിയടക്കം നിരീക്ഷണത്തിലാണ്. അത്തരം രോഗബാധിത മേഖലയില്‍ നിന്നാണ് ഡിജിപിയും കേരളത്തിലെത്തിയതെന്ന് ഓര്‍ക്കണം. എന്നിട്ടും ഇദ്ദേഹത്തെ നിരീക്ഷണത്തില്‍ വച്ചില്ല.
പ്രതികരിക്കാൻ ഇവിടെ എഴുതുക: