പന്തളം: പോലീസുകാരൻ സഞ്ചരിച്ച ബൈക്കിന് സൈഡ് കൊടുത്തില്ലെന്ന് ആരോപിച്ച് ടിപ്പർലോറി ഡ്രൈവർക്ക് ക്രൂര മർദ്ദനം. തെങ്ങമം മുണ്ടപ്പള്ളി കിണറുവിളയിൽ വിൽസൺ 42 നാണ് കൊടുമൺ സ്റ്റേഷനിൽ ക്രൂരമർദ്ധനത്തിന് ഇരയായത്.
അടൂർ സ്റ്റേഷൻ പരിധിയിൽ ആനന്ദപ്പള്ളി കച്ചേരിപ്പടി റോഡിൽ കോട്ടപ്പുറം ജംഗ്ഷന് സമീപം വച്ച് മോട്ടോർ സൈക്കിളിൽ വരികയായിരുന്ന കൊടുമൺ പോലീസ് സ്റ്റേഷനിലെ സിവിൽപോലീസ് ഓഫീസർ നാദാർഷയ്ക്ക് സൈഡ് കൊടുത്തില്ലന്ന് ആരോപിച്ച് ലോറിയെ പിന്തുടർന്ന് കുറുക്കിട്ട് പിടികൂടി കൊടുമൺ സ്റ്റേഷനിൽ എത്തിച്ച് സി. സി. ടി. വി ഇല്ലാത്ത ഭാഗത്തു കൊണ്ടുപോയി നെഞ്ചിനും തലയ്ക്കും ക്രൂരമായി മർദ്ധിക്കുകയായിരുന്നെന്ന് വിൽസൺ പറഞ്ഞു.
വിൽസണിനെ അടൂർ ജനറൽ ആശുപത്രിയിൽ തീവ്രപരിചരണ വിഭാഗത്തിൽ പ്രവേശിപ്പിച്ചു. വിൽസണിനെ അതിക്രൂരമായി മർദ്ധിച്ച സിവിൽ പോലീസ് ഓഫീസർ നാദർഷയ്ക്കെതിരെ ശക്തമായ നിയമ നടപടി സ്വീകരിക്കണമെന്ന് എംഎൽഎ ആവശ്യപ്പെട്ടു.
