കൊച്ചി: പ്രളയ തട്ടിപ്പുമായി ബന്ധപ്പെട്ട് ആത്മഹത്യ ചെയ്ത അയ്യനാട് സഹകരണ ബാങ്ക് ഡയറക്ടര്‍ വി.എ. സിയാദിന്റെ ആത്മഹത്യക്കുറിപ്പില്‍ പരാമര്‍ശിച്ചിരിക്കുന്നവര്‍ക്കെതിരെ കേസെടുത്ത് അന്വേഷിച്ച് ജയിലിലടക്കണമെന്ന് ബിജെപി ജില്ലാ പ്രസിഡന്റ് എസ്. ജയകൃഷ്ണന്‍ വാര്‍ത്താസമ്മേളനത്തില്‍ ആവശ്യപ്പെട്ടു.
സിപിഎം ജില്ലാ-സംസ്ഥാന നേതാക്കളുടെ പേരുകള്‍ കുറിപ്പില്‍ വ്യക്തമാക്കിയിട്ടുണ്ട്. സിപിഎം കളമശേരി ഏരിയ സെക്രട്ടറി സക്കീര്‍ ഹുസൈന്‍, സെന്‍ട്രല്‍ ലോക്കല്‍ കമ്മിറ്റി നേതാവ് കെ.എ. ജയചന്ദ്രന്‍, ബ്രാഞ്ച് സെക്രട്ടറി കെ.പി. നിസാര്‍ എന്നിവരുടെ പേരുകളാണ് ആത്മഹത്യക്കുറിപ്പിലുള്ളത്. നേരിട്ടുള്ള രേഖകള്‍ കിട്ടിയിട്ടും പോലീസ് ഇവര്‍ക്കെതിരെ നടപടിയെടുക്കുന്നില്ല. സിപിഎമ്മിന്റെ ആസൂത്രിതനീക്കമാണ് പ്രളയതട്ടിപ്പെന്നും അദ്ദേഹം പറഞ്ഞു.
സംസ്ഥാന സര്‍ക്കാര്‍ അന്വേഷിച്ചാല്‍ കേസ് പൂര്‍ണതയില്‍ എത്തില്ല, കേന്ദ്ര സര്‍ക്കാര്‍ ഏജന്‍സികളെക്കൊണ്ട് അന്വേഷിക്കണം, അല്ലാത്തപക്ഷം ബിജെപിയുടെ നേതൃത്വത്തില്‍ വന്‍ സമരങ്ങളിലേയ്‌ക്ക് നീങ്ങുമെന്നും അദ്ദേഹം പറഞ്ഞു. കൊറോണ ബാധയുടെ പശ്ചാത്തലത്തിലാണ് സമരം നിര്‍ത്തിവെച്ചിരിക്കുന്നതെന്നും അദ്ദേഹം പറഞ്ഞു. ബിജെപി ജില്ലാ ജനറല്‍ സെക്രട്ടറി അഡ്വ.കെ.എസ്. ഷൈജു, വൈസ് പ്രസിഡന്റ് അഡ്വ. എസ്. സജി തൃക്കാക്കര എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.
പ്രതികരിക്കാൻ ഇവിടെ എഴുതുക: