ടൂറിന്: ഇറ്റാലിയന് ഫുട്ബോള് ക്ലബ് യുവന്റസിന്റെ താരമായ ഡാനിയേല് റുഗാനിക്ക് കൊറാണയെന്ന് സ്ഥിരീകരണം. ക്രിസ്റ്റ്യാനോ റൊണാള്ഡോയുടെ സഹതാരമായ റുഗാനിയുടെ ആരോഗ്യനില ഗുരുതരമല്ലെന്നും താരവുമായി സമ്പര്ക്കത്തിലുണ്ടായിരുന്ന മറ്റുള്ളവരെ കണ്ടെത്താനുള്ള ശ്രമങ്ങളിലുമാണെന്ന് യുവന്റസ് വ്യക്തമാക്കി. റൊണാള്ഡോ അടക്കമുള്ള താരങ്ങള് കര്ശന നിരീക്ഷണത്തിലാണ് എന്നാണ് റിപ്പോര്ട്ട്.
കൊറോണ പിടിപെട്ടു എന്ന വാര്ത്തകള് പുറത്തുവന്നതിന് പിന്നാലെ ആരാധകരെ ആശ്വസിപ്പിച്ച് ഡാനിയേല് റുഗാനി രംഗത്തെത്തി. താന് സന്തോഷവാനാണ് എന്നായിരുന്നു റുഗാനിയുടെ ട്വീറ്റ്. കൊറോണയെ നേരിടാനുള്ള സംവിധാനങ്ങള്ക്കൊപ്പം ഏവരും സഹകരിക്കണമെന്ന് താരം ആരാധകരോട് ആവശ്യപ്പെട്ടു. ഇറ്റലിയിലെ സാഹചര്യങ്ങള് ഗുരുതരമായി തുടരുന്നതിനാല് സ്വന്തം നാടായ പോര്ച്ചുഗലിലാണ് റോണോ ഉള്ളത് എന്നാണ് സൂചന.
സീസണില് യുവന്റസിനായി ഏഴ് മത്സരങ്ങളില് ബൂട്ടുകെട്ടിയിരുന്നു ഡാനിയേല് റുഗാനി. 2015ല് യുവന്റസില് എത്തിയ താരത്തിന് 2023 വരെ കരാറുണ്ട്. അടച്ചിട്ട സ്റ്റേഡിയത്തില് ഇന്റര് മിലാനെതിരെ നടന്ന കഴിഞ്ഞ മത്സരത്തില് ബഞ്ചിലായിരുന്നു റുഗാനിയുടെ സ്ഥാനം. ഇറ്റലിയിലെ സാഹചര്യങ്ങള് മോശമായി തുടരുന്നതിനാല് സീരി എ ഏപ്രില് മൂന്നുവരെ നിര്ത്തിവച്ചു.
അതിനിടെ സതാംപ്ടണ് മുന്താരവും നിലവില് സാംപദോറിയയുടെ കളിക്കാരനുമായ മനോലോ ഗബിയാദിനിക്കും കൊറോണ സ്ഥിരീകരിച്ചു. രോഗം സ്ഥിരീകരിക്കപ്പെടുന്ന രണ്ടാമത്തെ സീരി എ താരമാണ് മനോലോ.
ഇംഗ്ലീഷ് പ്രീമിയര് ലീഗ് ക്ലബ് ലെസ്റ്റര് സിറ്റിയുടെ മൂന്ന് താരങ്ങളും കൊറോണ ലക്ഷണങ്ങള് കാണിച്ചതിനാല് നിരീക്ഷണത്തിലാണ്.
