അസുന്‍സ്യോന്‍ (പാരഗ്വായ്) : വ്യാജ പാസ്‌പോര്‍ട്ടുമായി പാരഗ്വായില്‍ അറസ്റ്റിലായ മുന്‍ ബ്രസീലിയന്‍ താരം റൊണാള്‍ഡീഞ്ഞോ ജയിലില്‍ ഫുട്‌ബോള്‍ കളിക്കൊരുങ്ങുന്നു. തടവുകാര്‍ക്ക് വേണ്ടി സംഘടിപ്പിക്കുന്ന ടൂര്‍ണമെന്റിലാണ് റൊണാള്‍ഡീഞ്ഞോ കളിക്കാനിറങ്ങുക.അഞ്ച് പേരടങ്ങുന്നതാണ് ഒരു ടീം. എല്ലാ ആറ് മാസവും കൂടുമ്പോള്‍ നടത്താറുള്ള മത്സരങ്ങള്‍ ഇത്തവണ വിശിഷ്ട അതിഥിയുടെ സാന്നിധ്യത്തില്‍ നേരത്തെ നടത്താന്‍ ജയില്‍ അധികൃതര്‍ തീരുമാനിക്കുകയായിരുന്നു.കളിക്കാന്‍ ഇറങ്ങുമെങ്കിലും റൊണാള്‍ഡീഞ്ഞോയെ ഗോളടിക്കാന്‍ അനുവദിക്കില്ല.റൊണാള്‍ഡോഞ്ഞീയോടെ മികവിനൊപ്പമെത്താന്‍ തടവുകാര്‍ക്ക് കഴിയില്ല എന്നതിനാല്‍ തുല്യമായ പോരാട്ടം ഉറപ്പുവരുത്താനാണ് റൊണാള്‍ഡീഞ്ഞോയെ ഗോളടിക്കാന്‍ അനുവദിക്കാത്തത്.
വ്യാജ പാസ്‌പോര്‍ട്ടുമായി പാരഗ്വായില്‍ പ്രവേശിച്ചതിനാണ് റൊണാള്‍ഡീഞ്ഞോയും സഹോദരന്‍ റോബര്‍ട്ടോയും അറസ്റ്റിലായത്. കോടതിയില്‍ ഹാജരായ ഇരുവരെയും കരുതല്‍ തടങ്കലില്‍ തന്നെ വയ്‌ക്കാന്‍ ജഡ്ജി ഉത്തരവിട്ടു. രാജ്യത്തിന്റെ സുരക്ഷയ്‌ക്കു ഭീഷണിയാകുന്ന കുറ്റം ചെയ്തതിനാലാണു ജാമ്യം അനുവദിക്കാത്തതെന്നും ജഡ്ജി പറഞ്ഞു. അസുന്‍സ്യോനിലെ സ്‌പെഷലൈസ്ഡ് പൊലീസ് ഗ്രൂപ്പിന്റെ ആസ്ഥാനത്ത് 194 തടവുകാര്‍ക്കൊപ്പമാണ് ഇരുവരെയും തടവില്‍ പാര്‍പ്പിച്ചിരിക്കുന്നത്.
സന്ദര്‍ശകരിലൊരാളാണ് താരത്തിന് ബെഡും പുതപ്പും നല്‍കിയത്. രാത്രി വൈകി ഒരു ഫാസ്റ്റ് ഫുഡ് റസ്റ്ററന്റില്‍ നിന്ന് ഭക്ഷണം ഓര്‍ഡര്‍ ചെയ്ത് കഴിക്കുകയും ചെയ്തു. വ്യാജ പാസ്‌പോര്‍ട്ട് കൈവശം വച്ചതിനു പുറമെ ഇരുവരും ‘മറ്റു ചില കുറ്റങ്ങളും’ ചെയ്തതായി പ്രോസിക്യൂട്ടര്‍ വ്യക്തമാക്കി. ഇക്കാര്യവും അന്വേഷണ പരിധിയിലാണ്. അതേസമയം, ‘മറ്റു ചില കുറ്റങ്ങള്‍’ എന്താണെന്ന് വ്യക്തമാക്കാന്‍ അദ്ദേഹം തയാറായില്ല.
റൊണാള്‍ഡീഞ്ഞോയെയും സഹോദരനെയും കസ്റ്റഡിയില്‍ സൂക്ഷിക്കുന്നത് നിയമവിരുദ്ധമാണെന്ന് ഇവരുടെ അഭിഭാഷകന്‍ സെര്‍ജിയോ ക്വിറോസ് ആരോപിച്ചു. വ്യാജ പാസ്‌പോര്‍ട്ട് ഉപയോഗിച്ചതായി ഇരുവരും ഏറ്റുപറഞ്ഞതാണെന്ന് ക്വിറോസ് ചൂണ്ടിക്കാട്ടി. പക്ഷേ, പാരഗ്വായ്‌ക്കെതിരെ ഇരുവരും എന്തെങ്കിലും ചെയ്തതായി തെളിഞ്ഞിട്ടില്ലെന്ന് അദ്ദേഹം പറഞ്ഞു. പാസ്‌പോര്‍ട്ട് വ്യാജമാണെന്ന വിവരം ഇരുവര്‍ക്കും അറിയില്ലായിരുന്നു. അന്വേഷണവുമായി ഇരുവരും തുടക്കം മുതലേ സഹകരിക്കുന്നുമുണ്ടെന്ന് ക്വിറോസ് പറഞ്ഞു.
പാരഗ്വായിലെ നിയമമനുസരിച്ച് ഇത്തരം കേസുകളില്‍ അന്വേഷണം പൂര്‍ത്തിയാക്കാന്‍ അധികൃതര്‍ക്ക് ആറു മാസം വരെ സമയം ലഭിക്കും. വെള്ളിയാഴ്ചയും ശനിയാഴ്ചയും സമ്പൂര്‍ണ സുരക്ഷാ സന്നാഹങ്ങളോടെയാണ് ഇരുവരെയും ജയിലില്‍ പാര്‍പ്പിച്ചത്.
