ചെങ്ങന്നൂര്‍: മാലിന്യം നിക്ഷേപിക്കുന്നതിനെ ചൊല്ലിയുള്ള തര്‍ക്കത്തെ തുടര്‍ന്ന് ചെങ്ങന്നൂരില്‍ അഭിഭാഷകന്‍ അടിയേറ്റ് മരിച്ചു. പുത്തന്‍കാവ് അങ്ങാടിക്കല്‍ ശാലേം നഗറില്‍ കുറ്റിക്കാട്ട് തൈക്കൂട്ടത്തില്‍ഏബ്രഹാം വര്‍ഗ്ഗീസ് (65) ആണ് മരിച്ചത്. സംഭവത്തെ തുടര്‍ന്ന് രണ്ട് പേരെ പോലീസ് കസ്റ്റഡിയിലെടുത്തു.
വെള്ളിയാഴ്ച അര്‍ധരാത്രിയോടെയാണ് നഗരത്തില്‍ ദാരുണമായ സംഭവം അരങ്ങേറിയത്. പുത്തൻ‌കാവിന് അടുത്തുള്ള ഒഴിഞ്ഞ സ്ഥലത്ത് മാലിന്യം കളയാനാണ് എബ്രഹാം പോയത്. മാലിന്യവുമായി സ്‌കൂട്ടറില്‍ പോയ എബ്രഹാമിനെ യുവാക്കള്‍ തടഞ്ഞെങ്കിലും, എബ്രഹാം വാഹനം നിര്‍ത്താതെ പോകുകയായിരുന്നു. തുടര്‍ന്ന് ബൈക്കില്‍ പിന്തുടര്‍ന്നെത്തിയ ഇവര്‍ എബ്രഹാം ധരിച്ചിരുന്ന ഹെല്‍മറ്റ് കൈക്കലാക്കി തലയ്‌ക്കടിക്കുകയായിരുന്നു. അടിയേറ്റ് വീണ എബ്രഹാമിനെ സമീപത്തെ സ്വകാര്യ ആശുപത്രിയിലും അവിടെ നിന്നും ചെങ്ങന്നൂര്‍ ജില്ലാ ആശുപത്രിയിലേക്ക് കൊണ്ടുപോകവേ മരണം സംഭവിക്കുകയായിരുന്നു.
യുവാക്കള്‍ എബ്രഹാമിനെ മര്‍ദിക്കുന്നത് സിസിടിവി ദൃശ്യങ്ങളില്‍ നിന്ന് വ്യക്തമായിട്ടുണ്ട്. സംഭവത്തെ തുടര്‍ന്ന് പോലീസ് കേസ് രജിസ്റ്റര്‍ ചെയ്ത് അന്വേഷണം ആരംഭിച്ചു.
പ്രതികരിക്കാൻ ഇവിടെ എഴുതുക: