കൊച്ചി: മരണാനന്തരവും അദ്ദേഹത്തിന്റെ യശസ് തുടരുന്നു. കഴിഞ്ഞ ദിവസം അന്തരിച്ച കെട്ടിട നിര്മാണ രംഗത്തെ മാതൃകയായി യശസേറ്റിയ യശോറാം എ.ആര്.എസ്. വാധ്യാരുടെ ഭൗതിക ദേഹം അമൃതാ ഇന്സ്റ്റിറ്റ്യൂട്ട് ഓഫ് മെഡിക്കല് സയന്സസിന് പഠിക്കാന് നല്കി.
മാതൃകയായിരുന്നു വാധ്യാര്. 75 ാം വയസില് അന്തരിക്കുമ്പോള്, വില്പ്പത്രത്തില് എഴുതിവെച്ചത് മക്കളും ബന്ധുക്കളും നടപ്പാക്കുകയായിരുന്നു.
കെട്ടിട നിര്മാണ രംഗത്ത് നാലുപതിറ്റാണ്ടിന്റെ പരിചയവും അനുഭവവും മാത്രമല്ല, വിശ്വാസ്യതയുമാണ് അദ്ദേഹം നേടിയത്. സിവില് എഞ്ചിനീയര് ബിരുദം നേടി സര്ക്കാര് ജോലിയിലിരിക്കെ 1977 -ല് ചെയ്ത ഒരു നിര് മാണ പദ്ധതിയാണ് അദ്ദേഹത്തെ കേരള ത്തിലെ മാത്രമല്ല, രാജ്യത്തെതന്നെ ഏറ്റവും മികച്ച ബില്ഡറാക്കിയത്. കെട്ടിട നിര്മാണ രംഗത്തെ കള്ളക്കച്ചവടങ്ങള് പെരുകിയപ്പോള് പല പേരുകളും വിവാദങ്ങളായപ്പോള് യശോറാം ബില്ഡേഴ്സ് വിശ്വാസഗോപുരങ്ങളായി നിന്നു. മരടിലെ നിര്മാണ ചട്ടങ്ങള് ലംഘിച്ച കെട്ടിടങ്ങള് വിവാദമായപ്പോള് അദ്ദേഹം പറഞ്ഞു, ചട്ടങ്ങള് ലംഘിക്കാന് അവസരം കൊടുക്കുന്നതാണ് പ്രശ്നമെന്ന കാതലായ വിഷയം ചൂണ്ടിക്കാട്ടി.
43 വര്ഷം മുമ്പ് യശോറാം ബില്ഡേഴ്സ് എന്ന പേരില് സ്ഥാപനം തുടങ്ങുമ്പോള് അത് വിശ്വാസ്യതയുടെ പര്യായമാക്കുക എന്നത് ഒരു മകന് അച്ഛനമ്മമാരോടുള്ള കടമയും കര്തവ്യവുംകൂടിയായിരുന്നു. അമ്മ യശോദയുടെയും അച്ഛന് രാമചന്ദ്രന്റെയും പേര് ചേര്ത്താണ് യശോറാം എ ന്ന പേര് കമ്പനിക്ക് സ്വീകരിച്ചത്. ആ യശസും വിശ്വാസ്യതയും ഓരോ കെട്ടിടങ്ങളും ഉയര്ന്നപ്പോള് പൊങ്ങിപ്പൊങ്ങി വന്നു. വീട്, കെട്ടിട സമുച്ചയം, ഷോപ്പിങ് കോംപ്ലക്സ്, ആശുപത്രികള് എന്നിങ്ങനെ വൈവിധ്യപൂര്ണമായ നിര്മാണ മേഖലയില് അമ്പലമുകളിലെ കുലദേവതാ ക്ഷേത്രവും നിര്മിച്ച വിശിഷ്ട നിര്മാണ ചരിത്രം പറയാന് വാധ്യാര്ക്കേ കഴിയുമായിരുന്നുള്ളു.
ഇതൊക്കെയാണെങ്കിലും, കൊച്ചിയെ സുന്ദരവും വികസിതവുമാക്കാന് വാധ്യാര് സമര്പ്പിച്ച പദ്ധതി നടപ്പാക്കാന് കഴിയാഞ്ഞ വ്യഥയുമായാണ് അദ്ദേഹം വിടപറഞ്ഞത്. യാത്രാക്ലേശമില്ലാതെ, കുണ്ടന്നൂര് മുതല് ചിലവന്നൂര് വരെയും അവിടെനിന്ന് നഗരത്തിലെ സുഭാഷ് പാര്ക്ക് വരെയും വിശലാമായ രണ്ട് ഫ്ളൈ ഓവറുകള്. വിശാലമായ സങ്കല്പ്പമാണത്, മനോഹരമായതും. പക്ഷേ, 2006 -ല് സമര്പ്പിച്ച പദ്ധതിക്ക് കേരളത്തിലെ മാറിമാറിവന്ന മുന്നണി സര്ക്കാരുകള് അനുമതി നല്കിയില്ല. ഇന്നലെ വീട്ടില് പൊതു ദര്ശനത്തിനു വെച്ച ഭൗതിക ദേഹത്തില് വിവിധ മേഖലയിലുള്ളവര് അന്ത്യാഞ്ജലി അര്പ്പിച്ചു. വൈകിട്ട് നാലുമണിക്ക് ദേഹം എയിംസിലേക്ക് കൊണ്ടുപോയി.
