കോഴിക്കോട്: അലന്, ത്വാഹ എന്നിവരെ യുഎപിഎ ചുമത്തി ജയിലിലടച്ചതില് സിപിഎമ്മിനെ വെട്ടിലാക്കി ഇടത് സാസ്കാരിക പ്രവര്ത്തകര് രംഗത്ത്. മാവോയിസ്റ്റുകളെന്ന് മുദ്രകുത്തി യുഎപിഎ ചുമത്തി എന്ഐഎ കസ്റ്റഡിയില് കഴിയുന്ന ഇരുവരെയും രക്ഷിക്കാന് അടിയന്തരമായി ഇടപെടണമെന്നാവശ്യപ്പെട്ടാണ് ഇടത് സാംസ്കാരിക നായകന്മാര് നിവേദനവുമായി ഇറങ്ങിയിരിക്കുന്നത്.
കെ. സച്ചിദാനന്ദന്, ഷബ്നം ഹാഷ്മി, അമിത് ചൗധരി, അപൂര്വാനന്ദ്, ബി. രാജീവന്, കെ.ആര്. മീര, അമിയ ദേവ്, അന്വര് അലി, ഡോ. ഖദീജ മുംതാസ്, ജി. ശക്തിധരന്, നീലന് പ്രേംജി, പി.കെ. പോക്കര്, ബി.ആര്.പി. ഭാസ്കര്, ഡോ. ആസാദ്, എന്.പി. ചേക്കുട്ടി, കെ. അജിത, കെ.പി. പ്രകാശന്, മൈത്രി പ്രസാദ്, കല്പ്പറ്റ നാരായണന് തുടങ്ങി മുപ്പത്തഞ്ചോളം സാംസ്കാരിക പ്രവര്ത്തകര് മുഖ്യമന്ത്രിക്കുള്ള നിവേദനത്തില് ഒപ്പുവച്ചിട്ടുണ്ട്. ഫെബ്രുവരി 12ന് സെക്രട്ടേറിയറ്റിന് മുമ്പില് സാംസ്കാരിക പ്രതിരോധം തീര്ക്കാനും തീരുമാനമുണ്ട്. പാര്ട്ടി നിലപാടിന് എതിരാണ് മുഖ്യമന്ത്രിയുടെ നിലപാട് എന്നാണ് പുരോഗമന കലാസാഹിത്യസംഘം നേതാവ് ഡോ. പി.കെ. പോക്കറും ഡോ. ആസാദും വാര്ത്താസമ്മേളനത്തില് പറഞ്ഞത്.
അതേസമയം അലന്റെയും ത്വാഹയുടെയും രക്ഷിതാക്കള് സിപിഎം സംഘടിപ്പിച്ച മനുഷ്യശൃംഖലയില് കണ്ണികളായതോടെ പ്രശ്നം സിപിഎമ്മില് കടുത്ത ഭിന്നതയ്ക്കിടയാക്കിയിരിക്കുകയാണ്. ഇരുവരുടെയും സിപിഎം കുടുംബമാണെന്നിരിക്കെ യുഎപിഎ ചുമത്തിയുള്ള അറസ്റ്റ് ഒരു തരത്തിലും ന്യായീകരിക്കാനാവില്ലെന്ന വികാരമാണ് പാര്ട്ടിയില് ശക്തമാവുന്നത്. മുസ്ലീങ്ങളായതുകൊണ്ടാണ് യുഎപിഎ ചുമത്തിയതെന്ന് ഒരു വിഭാഗം മുസ്ലിം സംഘടനകള് പ്രചരിപ്പിക്കുന്നതിനെ പ്രതിരോധിക്കാന് സിപിഎമ്മിന് കഴിയുന്നില്ല. സജീവ മാവോയിസ്റ്റുകള് നാട്ടില് വിലസി നടക്കുമ്പോള് അവര്ക്കെതിരെ നടപടിയെടുക്കാത്തപ്പോഴാണ് അലനും ത്വാഹയും അറസ്റ്റ് ചെയ്യപ്പെട്ടതെന്നാണ് വിമര്ശനം ഉയരുന്നത്. ചെ ഗുവേരയെ പൂജിക്കുന്നവരാണ് ഇരുവയും അറസ്റ്റുചെയ്തതെന്ന കടുത്ത പരിഹാസവും ഉയരുന്നുണ്ട്.
