തിരുവനന്തപുരം: ആരോഗ്യം, വിദ്യാഭ്യാസം, ഭവന നിര്മ്മാണം തുടങ്ങി എല്ലാ മേഖലകളിലും സംസ്ഥാന സര്ക്കാരിനു മുന്നേറാനായെന്ന് ഗവര്ണര് ആരിഫ് മുഖമ്മദ് ഖാന് നയപ്രഖ്യാപന പ്രസംഗത്തില് പറഞ്ഞു. ലൈഫ് മിഷന് പദ്ധതി പ്രകാരം വീട് നിര്മ്മാണം മുന്നോട്ടു പോകുന്നു. പൊതുജന പങ്കാളിത്തത്തോടെ ഇത് കൂടുതല് വ്യാപിപ്പിക്കും.
ഡെവലപ്പര് എന്നതിനേക്കാള് ഒരു ഫെസിലിറ്റേറ്റര് എന്ന് പുനര്നിര്വഹിച്ചു കൊണ്ട് ഒരു ഹൗസിങ് പോളിസി ഈ വര്ഷം നടപ്പാക്കും. മറ്റ് ആശ്രയമില്ലാത്ത വീട്ടമ്മമാര്ക്ക് അത്യാവശ്യ ഘട്ടങ്ങളില് അരലക്ഷം രൂപ വരെ സഹായം നല്കുന്ന പദ്ധതി നടപ്പാക്കുമെന്നും നയപ്രഖ്യാപനത്തില് പറയുന്നു.
ഈസ് ഓഫ് ഡൂയിങ് ബിസിനസ് റാങ്കിങ്ങില് അടുത്ത അഞ്ച് വര്ഷത്തിനുള്ളില് അഞ്ചിലൊന്നായി കേരളത്തെ മെച്ചപ്പെടുത്തും. നിക്ഷേപകര്ക്ക് വ്യവസായ നിക്ഷേപം സംബന്ധിച്ച് വേണ്ട എല്ലാ വിവരങ്ങളും ലഭ്യമാക്കുന്നതിന് 24/7 ഒരു ടോള്ഫ്രീ നമ്പര് ആരംഭിക്കും. ഐടി പാര്ക്കുകള് കഴിഞ്ഞ മൂന്ന് വര്ഷത്തിനിടെ വന് വികസനത്തിന് വേദിയായി. തിരുവനന്തപുരം ടെക്നോപാര്ക്കില് 4.50 ലക്ഷം ചതുരശ്ര അടിയില് ഒരു പുതിയ ഐ ടി കെട്ടിടം നിര്മ്മിക്കും.
2020 ഓടെ എല്ലാ പഞ്ചായത്തുകളും ഐഎസ്ഒ അംഗീകാരം നേടും. നൂറുപേര്ക്ക് ഒരു സന്നദ്ധ പ്രവര്ത്തകനെന്ന അനുപാതത്തില് വൊളന്റിയര് സേന രൂപീകരിക്കും. 2020 മേയ് അവസാനത്തോടെ ഈ വൊളന്റിയര് യൂണിറ്റുകള് തയാറാകും. ഇത് വഴി 3,40,000 കമ്മ്യൂണിറ്റി വൊളന്റിയര്മാരുടെ സേവനം സംസ്ഥാനത്തിന് ലഭ്യമാകും. കാസര്ഗോഡ്-തിരുവനന്തപുരം സെമി ഹൈസ്പീഡ് റെയില് പദ്ധതി അടുത്ത അഞ്ച് വര്ഷത്തിനുള്ളില് പൂര്ത്തിയാക്കുമെന്നും നയപ്രഖ്യാപനം പറയുന്നു.
