തിരുവനന്തപുരം: നിയമസഭയില് നയപ്രഖ്യാപനം നടത്താന് വന്ന ഗവര്ണറെ കോണ്ഗ്രസ് എംഎല്എമാര് തടഞ്ഞ സംഭവത്തില് കേരളം ലജ്ജിച്ച് തലതാഴ്ത്തുകയാണെന്ന് ബിജെപി മുന് സംസ്ഥാന അധ്യക്ഷന് കുമ്മനം രാജശേഖരന്. ഭരണഘടന സംരക്ഷിക്കുകയെന്ന പ്ലക്കാര്ഡുമായി പരസ്യമായാണ് എംഎല്എമാര് ഭരണഘടന ലംഘിച്ചത്. ഗവര്ണറെ തടഞ്ഞു നിര്ത്താന് ഇവര്ക്ക് ആരാണ് അധികാരം നല്കിയത്. ഇതിന് കോണ്ഗ്രസ് സമാധാനം പറയണമെന്നും കുമ്മനം ആവശ്യപ്പെട്ടു.
യുഡിഎഫ്-എല്ഡിഎഫ് രാജ്യദ്രോഹ കൂട്ടുകെട്ടിനെതിരെയും ‘നാടിന് സുരക്ഷയേകീടാന് അതിര്ത്തികളെല്ലാം കാത്തിടാന് നമുക്ക് വേണം സിഎഎ’ എന്ന മുദ്രാവാക്യവുമായി ബിജെപി തിരുവനന്തപുരം ജില്ലാ ഘടകത്തിന്റെ നേതൃത്വത്തില് നിയമസഭയിലേക്ക് നടത്തിയ മാര്ച്ച് ഉദ്ഘാടനം ചെയ്യുകയായിരുന്നു അദ്ദേഹം.
യുഡിഎഫ്-എല്ഡിഎഫ് കള്ള കൂട്ടുകെട്ടാണ് നിയമസഭയില് ഇന്നലെ കണ്ടത്. ഇരുകൂട്ടരും നാടകം കളിച്ച് ജനങ്ങളെ കബളിപ്പിക്കുന്നു. സഹോദരന്മാരെപ്പോലെയാണ് ഇവര് പ്രവര്ത്തിക്കുന്നത്. ഭരണഘടനാപരമായ സ്വാതന്ത്ര്യം ഉപയോഗിച്ച് മാത്രമാണ് ഗവര്ണര് പ്രവര്ത്തിക്കുന്നത്. അതിനപ്പുറം അദ്ദേഹം ഒരു ഭരണഘടനാ ലംഘനവും നടത്തിയിട്ടില്ല. എന്ത് തെറ്റാണ് അദ്ദേഹം ചെയ്തതെന്ന് രമേശ് ചെന്നിത്തല വ്യക്തമാക്കണം.
ലജ്ജാകരമായ രാഷ്ട്രീയ പാപ്പരത്തമാണ് ഇന്ന് കേരളത്തില്. ഭരണഘടനാ സ്ഥാനത്തിരിക്കുന്ന ഗവര്ണറും രാഷ്ട്രപതിയുമൊക്കെ ഈ നാടിന്റെ അഭിമാനമാണ്. പാര്ലമെന്റിലേക്ക് രാഷ്ട്രപതി കടന്നുവരുമ്പോഴും കോണ്ഗ്രസുകാര് തടയുമോ. പൗരത്വ നിയമം നടപ്പാക്കിയാല് കേരളത്തിലെ ഏത് പൗരനെയാണ് ബാധിക്കുന്നത്. ബാധിക്കുന്ന പൗരന്റെ പേര് പരസ്യമായി നിയമസഭയില് വ്യക്തമാക്കാന് പിണറായി വിജയനും ചെന്നിത്തലയ്ക്കും ധൈര്യമുണ്ടോയെന്നും അദ്ദേഹം ചോദിച്ചു.
ഗവര്ണറെ തിരിച്ചുവിളിക്കണമെന്ന് പറയുന്ന രമേശ് ചെന്നിത്തലയെ ഹരിപ്പാട്ടെ ജനങ്ങള് തിരിച്ചു വിളിക്കണം. ഭരണഘടനാ ലംഘനമാണ് രമേശ് ചെന്നിത്തല നടത്തിയത്. ജനങ്ങളെ വഞ്ചിക്കുന്ന കോണ്ഗ്രസ്-എല്ഡിഎഫ് കൂട്ടുകെട്ടിനെതിരെ ബിജെപി വരും ദിവസങ്ങളില് ശക്തമായ സമരങ്ങള് നടത്തുമെന്നും കുമ്മനം പറഞ്ഞു.
