ന്യൂദല്ഹി : വിശ്വാസവുമായി ബന്ധപ്പെട്ട ശബരിമല, ഹാജി അലി ദര്ഗ്ഗ കേസുകള് പത്തു ദിവസത്തിനകം വിചാരണ പൂര്ത്തിയാക്കണമെന്ന് ചീഫ് ജസ്റ്റിസ് എസ്.എ. ബോബ്ഡെ. 22 ദിവസത്തിനുള്ളില് വാദം കേള്ക്കാമെന്ന് അഭിഭാഷകരുടെ യോഗം സുപ്രീംകോടതിയെ അറിയിച്ചിരുന്നു. ഇതിന് നല്കിയ മറുപടിയില് 10 ദിവസത്തിനുള്ളില് വാദം പൂര്ത്തിയാക്കണമെന്ന് ബോബ്ഡെ ആവശ്യപ്പെട്ടു.
വിശാല ബെഞ്ചിനു വിട്ട കേസില് ഇതുവരെ അഭിപ്രായസമന്വയം ഉണ്ടായിട്ടില്ലെന്ന് സോളിസിറ്റര് ജനറല് തുഷാര് മേത്ത സുപ്രീംകോടതിയെ അറിയിച്ചു. അതിനുപിന്നാലെയാണ് വാദം പൂര്ത്തിയാക്കാന് ചീഫ് ജസ്റ്റിസ് നിര്ദ്ദേശം നല്കിയത്. കോടതി തന്നെ കേസിലെ പരിഗണന വിഷയങ്ങള് തയ്യാറാക്കണമെന്നും അദ്ദേഹം അഭിപ്രായപ്പെട്ടു.
അേേതസമയം ഒമ്പതംഗ ഭരണഘടനാ ബെഞ്ച് ശബരിമല പുനഃപരിശോധനാ ഹര്ജികള് പരിഗണിക്കില്ലെന്ന് ഈ മാസം 13ന് ചീഫ് ജസ്റ്റിസ് വ്യക്തമാക്കിയതാണ്. അഞ്ചംഗക ബെഞ്ച് ഉന്നയിച്ച ഏഴ് ചോദ്യങ്ങള് മാത്രമാണ് പരിഗണിക്കുക. കൂടാതെ കോടതിക്ക് മുമ്പിലുള്ള ചോദ്യങ്ങള് ആവശ്യമെങ്കില് പുനഃക്രമീകരിക്കുമെന്നും ചീഫ് ജസ്റ്റിസ് പറഞ്ഞിരുന്നു. മറ്റ് മതങ്ങളുമായി ബന്ധപ്പെടുന്നത് ഉള്പ്പടെയുള്ളവയാണ് കോടതി പരിഗണിക്കുന്നത്.
ഇതോടൊപ്പം മുസ്ലിം, പാഴ്സി, ജൈന മതാചാരങ്ങളുടെ സാധ്യതയും സുപ്രീംകോടതി പരിഗണിക്കും, ഹാജി അലി ദര്ഗ്ഗയിലെ യുവതി പ്രവേശനം സംബന്ധിച്ച കേസും വിശാല ബെഞ്ച് പത്ത് ദിവസത്തിനുള്ളില് വിചാരണ പൂര്ത്തിയാക്കും. വിശദമായ വാദത്തിന് മുമ്പ് അഭിഭാഷകര് യോഗം ചേര്ന്ന് ഉന്നയിക്കേണ്ട കാര്യങ്ങള് ചര്ച്ച ചെയ്യും.
