തിരുവനന്തപുരം: ഗവര്ണര് ആരിഫ് മുഹമ്മദിനെതിരെ പ്രതിപക്ഷത്തിന്റെ പ്രസ്താവനകള് പിണറായി സര്ക്കാരിനെ കുടുക്കാനെന്ന് ഇടത് മുന്നണി. കേരളത്തില് നിലവില് ഭരണ പ്രതിസന്ധിയൊന്നുമില്ലെന്നും ഇടത് മുന്നണി കണ്വീനര് എ. വിജയരാഘവന് അറിയിച്ചു. പൗരത്വ നിയമ ഭേദഗതി വിഷയത്തില് ഗവര്ണര് ആരിഫ് മുഹമ്മദ് ഖാനെ കേന്ദ്രം തിരിച്ചുവിളിക്കണമെന്ന് പ്രമേയം അവതരിപ്പിക്കണമെന്ന പ്രതിപക്ഷ നേതാവ് രമേശ് ചെന്നിത്തലയുടെ പ്രസ്താവനയ്ക്ക് നല്കിയ മറുപടിയിലാണ് ഇക്കാര്യം അറിയിച്ചത്.
സംസ്ഥാനത്ത് ഇപ്പോള് ഭരണഘടനാ പ്രതിസന്ധിയൊന്നുമില്ല. വിഷയത്തില് വിസിലടിക്കുന്നതിന് മുമ്പ് ഗോളടിക്കാനുള്ള ചെന്നിത്തലയുടെ ശ്രമമാണ്. ഇത് പ്രോത്സാഹിപ്പിക്കാനാകില്ലെന്നും വിജയരാഘവന് കൂട്ടിച്ചേര്ത്തു.
അതേസമയം വിഷയത്തില് മന്ത്രി എ.കെ ബാലനും ചെന്നിത്തലയെ രൂക്ഷമായി വിമര്ശിച്ചിരുന്നു. കലക്കവെള്ളത്തില് മീന് പിടിക്കാനുള്ള ശ്രമമാണ് ചെന്നിത്തല നടത്തുന്നതെന്നാണ് മന്ത്രി വിമര്ശിച്ചത്. ഗവര്ണറും സര്ക്കാരും തമ്മില് പ്രശ്നങ്ങളില്ല.
അഭിപ്രായ വ്യത്യാസങ്ങള് ഉടലെടുക്കുന്നത് ഇത് ആദ്യമല്ല. സര്ക്കാരിനെ സംരക്ഷിക്കാനുള്ള നീക്കത്തില് ഞങ്ങളാണ് മുന്പന്തിയില് എന്നൊരു ധാരണയൊന്നും ആര്ക്കും വേണ്ട. സര്ക്കാരും ഗവര്ണറും തമ്മിലുള്ള ബന്ധം വഷളാക്കാന് ആരേയും അനുവദിക്കില്ലെന്നുമാണ് എ.കെ. ബാലന് പ്രതികരിച്ചത്.
