നാലാമനായി ക്രീസിലെത്തി: ബാറ്റുകൊണ്ട് അടിയുടെ പൂരം തീര്‍ത്ത് അജയ്യനായ് അയ്യര്‍

ഓക്‌ലന്‍ഡ്: താന്‍ മഹാനായ ഫിനിഷറാണെന്ന് ശ്രേയസ് അയ്യര്‍ ഒരിക്കല്‍ കൂടി തെളിയിച്ചു. നാലാമനായി ക്രീസിലെത്തി ബാറ്റുകൊണ്ട് അടിയുടെ പൂരം തീര്‍ത്ത  അയ്യര്‍, ന്യൂസിലന്‍ഡിനെതിരായ ആദ്യ ടി 20യില്‍  ഇന്ത്യക്ക് ആറു വിക്കറ്റ് വിജയം സമ്മാനിച്ചു. പത്തൊമ്പതാം ഓവറില്‍ അവസാന പന്ത് വേലിക്കെട്ടിന് പുറത്തേക്ക് തൂക്കിയടിച്ചാണ് അയ്യര്‍ മത്സരം അവസാനിപ്പിച്ചത്. അയ്യര്‍  58 റണ്‍സുമായി അജയ്യനായി നിന്നു. ഈ മികവിന് കളിയിലെ കേമനുളള പുരസ്‌കാരവും ലഭിച്ചു. 

ന്യൂസിലന്‍ഡ് മുന്നോട്ട് വച്ച 204 റണ്‍സെന്ന കൂറ്റന്‍ വിജയലക്ഷ്യം പിന്തുടര്‍ന്ന ഇന്ത്യ ഒരു ഓവര്‍ ശേഷിക്കെ നാലു വിക്കറ്റ് നഷ്ടത്തില്‍ ജയം സ്വന്തമാക്കി. ആദ്യം ബാറ്റ് ചെയ്ത ന്യൂസിലന്‍ഡ് ഇരുപത് ഓവറില്‍ അഞ്ചു വിക്കറ്റിന് 203 റണ്‍സ് കുറിച്ചു. ഈ വിജയത്തോടെ ഇന്ത്യ അഞ്ചു മത്സരങ്ങളുടെ പരമ്പരയില്‍ 1-0 ന് മുന്നിലെത്തി. 

29 പന്തില്‍ അഞ്ചു ഫോറും മൂന്ന് സിക്‌സും സഹിതമാണ് അയ്യര്‍ 58 റണ്‍സ് കുറിച്ചത്. ടി 20 യില്‍ അയ്യരുടെ രണ്ടാം അര്‍ധ ശതകമാണിത്. മിന്നുന്ന ഫോം തുടരുന്ന ഓപ്പണര്‍ കെ.എല്‍. രാഹുലും അര്‍ധശതകം നേടി. 27 പന്തില്‍ നാല് ഫോറും മൂന്ന് സിക്‌സും അടക്കം 56 റണ്‍സ് കുറിച്ചു. ക്യാപ്റ്റന്‍ കോഹ്‌ലിയും തിളങ്ങി. 32 പന്തില്‍ 45 റണ്‍സ് അടിച്ചെടുത്തു. മൂന്ന് ഫോറും ഒരു സിക്‌സും ഉള്‍പ്പെട്ട ഇന്നിങ്‌സ്.

കൂറ്റന്‍ വിജയലക്ഷ്യം പിന്തുടര്‍ന്ന ഇന്ത്യക്ക് രണ്ടാം ഓവറില്‍ രോഹിത് ശര്‍മയെ നഷ്ടമായി. സ്പിന്നര്‍ സാന്ററെ ഉയര്‍ത്തിയടിക്കാന്‍ ശ്രമിച്ച രോഹിത് ടെയ്‌ലറുടെ കൈപ്പിടിയിലൊതുങ്ങി. ഏഴു റണ്‍സാണ് രോഹിതിന്റെ നേട്ടം.ക്യാപ്റ്റന്‍ കോഹ്‌ലിയും കെ.എല്‍. രാഹുലും അടിച്ചുതകര്‍ത്തതോടെ ഇന്ത്യന്‍ സ്‌കോര്‍ബോര്‍ഡിലേക്ക് വേഗത്തില്‍ റണ്‍സ് ഒഴുകി. രണ്ടാം വിക്കറ്റില്‍ ഇവര്‍ 99 റണ്‍സ് അടിച്ചെടുത്തു. രാഹുല്‍ സ്പിന്നര്‍ സോധിയുടെ പന്തില്‍ പുറത്തായി.

നാലാമനായി ഇറങ്ങിയ ശ്രേയസ് അയ്യര്‍ ഒരറ്റത്ത് പിടിച്ചു നിന്നു. കോഹ്‌ലിയും ശിവം ദുബെയും പുറത്തായതോടെ ഇന്ത്യയൊന്ന് പരുങ്ങി. പക്ഷെ മനീഷ് പാണ്ഡെ ശ്രേയസ് അയ്യര്‍ക്ക് മികച്ച പിന്തുണ നല്‍കിയതോടെ മത്സരം ഇന്ത്യയക്ക് അനുകൂലമായി. മനീഷ് പാണ്ഡെ 12 പന്തില്‍ 14 റണ്‍സുമായി കീഴടങ്ങാതെ നിന്നു.

ടോസ് നഷ്ടപ്പെട്ട ബാ്റ്റ് ചെയ്ത ആതിഥേയര്‍ ക്യാപ്റ്റന്‍ കെയ്ന്‍ വില്യംസണ്‍, ഓപ്പണര്‍ കോളിന്‍ മണ്‍റോ, റോസ് ടെയ്‌ലര്‍ എന്നിവരുടെ അര്‍ധശതകങ്ങളുടെ പിന്‍ബലത്തിലാണ് 203 റണ്‍സ് എടുത്തത്. മണ്‍റോ 42 പന്തില്‍ ആറു ഫോറും രണ്ട് സിക്‌സും അടക്കം 59 റണ്‍സ് നേടി ടോപ്പ് സ്‌കോററായി.

വില്യംസണ്‍ 26 പന്തില്‍ 51 റണ്‍സ് അടിച്ചെടുത്തു. നാലു ഫോറും അത്രയും തന്നെ സിക്‌സും അടിച്ചു. റോസ് ടെയ്‌ലര്‍ 27 പന്തില്‍ 54 റണ്‍സുമായി പുറത്താകാതെ നിന്നു. മൂന്ന് ഫോറും മൂന്ന് സിക്‌സും ഉള്‍പ്പെട്ട ഇന്നിങ്‌സ്. ഇന്ത്യക്കായി ജസ്പ്രീത് ബുംറ , ഷാര്‍ദുല്‍ താക്കൂര്‍, യുസ്‌വേന്ദ്ര ചഹല്‍, ശിവം ദുബെ, രവീന്ദ്ര ജഡേജ എന്നിവര്‍ ഓരോ വിക്കറ്റ് എടുത്തു. 

സ്‌കോര്‍ബോര്‍ഡ്

ന്യൂസിലന്‍ഡ്: മാര്‍ട്ടിന്‍ ഗുപ്റ്റില്‍ സി ശര്‍മ ബി ദുബെ 30, കോളിന്‍ മണ്‍റോ സി ചഹല്‍ ബി താക്കൂര്‍ 59, കെയ്ന്‍ വില്യംസണ്‍ സി കോഹ്‌ലി ബി ചഹല്‍ 51, കോളിന്‍ ഗ്രാന്‍ഡ്‌ഹോം സി ദുബെ ബി ജഡേജ 0, റോസ് ടെയ്‌ലര്‍ നോട്ടൗട്ട് 54, ടിം സീഫെര്‍ട്ട് സി അയ്യര്‍ ബി ബുംറ 1, മിച്ചല്‍ സാന്റര്‍ നോട്ടൗടട് 2, എക്‌സ്ട്രാസ് 6, ആകെ 20 ഓവറില്‍ അഞ്ചു വിക്കറ്റിന് 203.

വിക്കറ്റ് വീഴ്ച: 1-80, 2-116, 3-117, 4-178, 5-181

ബൗളിങ്: ജസ്പ്രീത് ബുംറ 4-0-31-1, ഷാര്‍ദുല്‍ താക്കൂര്‍ 3-0-44-1, മുഹമ്മദ് ഷമി 4-0-53-0, യുസ്‌വേന്ദ്ര ചഹല്‍ 4-0-32-1, ശിവം ദുബെ 3-0-24-1, രവീന്ദ്ര ജഡേജ 2-0-18-1.

ഇന്ത്യ: രോഹിത് ശര്‍മ സി ടെയ്‌ലര്‍ ബി സാന്റര്‍ 7, കെ.എല്‍. രാഹുല്‍ സി സൗത്തി ബി സോധി 56, വിരാട് കോഹ് ലി സി ഗുപ്റ്റില്‍ ബി ടിക്ക്‌നര്‍ 45, ശ്രേയസ് അയ്യര്‍ നോട്ടൗട്ട് 58, ശിവം ദുബെ സി സൗത്തി ബി സോധി 13, മനീഷ് പാണ്ഡെ നോട്ടൗട്ട് 14, എക്‌സ്ട്രാസ് 11, ആകെ. 19 ഓവറില്‍ നാല് വിക്കറ്റിന് 204.

വിക്കറ്റ് വീഴ്ച: 1-16, 2-115, 3-121, 4-142.

ബൗളിങ്: ടിം സൗത്തി 4-0-48-0, മിച്ചല്‍ സാന്റര്‍ 4-0-50-1, ഹമിഷ് ബെ്ന്നറ്റ് 4-0-36-0, ബ്ലെയര്‍ ടിക്ക്‌നര്‍ 3-0-34-1, ഇഷ് സോധി 4-0-36-2.