മലപ്പുറം: മഞ്ചേരി ഗവ. മെഡിക്കല് കോളേജില് ചെവിവേദനയ്ക്ക് ചികിത്സ തേടിയെത്തിയ യുവാവ് മരിച്ച സംഭവം വിവാദമാകുന്നു. ഇരുമ്പുഴി പാലത്തിങ്ങല് വേലായുധന്റെ മകന് പ്രകാശന് (39) ആണ് മരിച്ചത്. വെള്ളിയാഴ്ച രാത്രിയാണ് സംഭവം.
ചെവി വേദനയെ തുടര്ന്ന് ഭാര്യയോടൊപ്പമാണ് പ്രകാശന് മെഡിക്കല് കോളേജിലെത്തിയത്. ചികിത്സയുടെ ഭാഗമായി ഇഞ്ചക്ഷന് കൊടുത്തതോടെ പ്രകാശന് ദേഹാസ്വാസ്ഥ്യമുണ്ടായി. പിന്നീട് മരണവിവരമാണ് ബന്ധുക്കള് അറിയുന്നത്. ചികിത്സയിലുണ്ടായ വീഴ്ചയാണ് മരണകാരണമെന്ന് ആരോപിച്ച്
ബന്ധുക്കള് രംഗത്തെത്തിയതോടെ ആശുപത്രി പരിസരം യുദ്ധസമാനമായി. പ്രതിഷേധത്തില് നാട്ടുകാര്കൂടി പങ്കുചേര്ന്നതോടെ ആശുപത്രി സൂപ്രണ്ടും ഡോക്ടര്മാരും സംഭവസ്ഥലത്ത് നിന്ന് മാറിനിന്നു. പോലീസ് സ്ഥലത്തെത്തിയാണ് സ്ഥിതിഗതികള് നിയന്ത്രിച്ചത്. പ്രകാശന്റെ മൃതദേഹം കോഴിക്കോട് മെഡിക്കല് കോളേജില് പോസ്റ്റ്മോര്ട്ടം നടത്തി ഇന്നലെ സംസ്ക്കരിച്ചു.
സംഭവത്തെക്കുറിച്ച് പ്രതികരിക്കാന് ആശുപത്രി അധികൃതര് തയാറായിട്ടില്ല. മഞ്ചേരി പോലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചു. കല്ല്യാണിയാണ് പ്രകാശന്റെ അമ്മ. ഭാര്യ: സൗമ്യ.
