തിരുവനന്തപുരം: സംസ്ഥാന സര്‍ക്കാരിന്റെ അതിഥിയായി, കേരള സര്‍വകലാശാലയിലെ പ്രഭാഷണ പരമ്പരയില്‍ പങ്കെടുക്കാന്‍ കുടുംബ സമേതമെത്തിയ നൊബേല്‍ ജേതാവ് മൈക്കേല്‍ ലെവിറ്റിനെ അപമാനിച്ചതിന് മുഖ്യമന്ത്രി പിണറായി വിജയനും കൂട്ടരും സമാധാനം പറയണമെന്ന് കേന്ദ്ര വിദേശകാര്യ സഹമന്ത്രി വി. മുരളീധരന്‍.
കേരളത്തില്‍ നേരിട്ട ദുരനുഭവം ലെവിറ്റ് തന്നെയാണ് തുറന്ന് പറഞ്ഞത്. ദൈവത്തിന്റെ സ്വന്തം നാടും വിനോദ സഞ്ചാരികളുടെ പറുദീസയും കിഴക്കിന്റെ വെനീസും ഒക്കെ പരസ്യത്തില്‍ മാത്രമേയുള്ളൂവെന്ന് ലെവിറ്റ് തിരിച്ചറിഞ്ഞെന്നും മുരളീധരന്‍ തുറന്നടിച്ചു.
സാമൂഹ്യവിരുദ്ധരാണ് തടഞ്ഞതെന്നും കര്‍ശന നടപടിയുണ്ടാവുമെന്നും ടൂറിസം മന്ത്രി കടകംപള്ളി സുരേന്ദ്രന്‍ വാചകക്കസര്‍ത്ത് നടത്തി. എന്നാല്‍ ഇത് കൊണ്ട് കാര്യമില്ല. നിയമവാഴ്ചയില്ലാത്ത നാടായി കേരളം മാറിയെന്ന് പറയിപ്പിക്കാന്‍ ഇടവരുത്തിയ സമരാഭാസക്കാര്‍ക്കെതിരെ നടപടിയെടുക്കാന്‍ സര്‍ക്കാരിന് ആര്‍ജവുണ്ടോയെന്നും കേന്ദ്രമന്ത്രി ചോദിച്ചു.
ഫെയ്‌സ്ബുക്ക് പോസ്റ്റിന്റെ പൂര്‍ണരൂപം:-
ദേശീയ പണിമുടക്ക് ഹര്‍ത്താലായി മാറുന്ന വിചിത്രമായ ആചാരം പിന്തുടരുന്ന കേരളത്തില്‍, വിനോദ സഞ്ചാരത്തെ പണിമുടക്കില്‍ നിന്ന് ഒഴിവാക്കിയെന്ന് സര്‍വകക്ഷി യോഗം വിളിച്ച് പ്രഖ്യാപിച്ച പിണറായിയും കൂട്ടരും ആലപ്പുഴയില്‍ പണിമുടക്ക് അനുകൂലികള്‍ തടഞ്ഞ ഹൗസ്‌ബോട്ടിലുണ്ടായിരുന്ന നൊബേല്‍ ജേതാവ് മൈക്കേല്‍ ലെവിറ്റിനെ അപമാനിച്ചതിന് സമാധാനം പറഞ്ഞേ തീരൂ.
സംസ്ഥാന സര്‍ക്കാരിന്റെ അതിഥിയായി കേരള സര്‍വകലാശാലയിലെ പ്രഭാഷണ പരമ്പരയില്‍ പങ്കെടുക്കാന്‍ കുടുംബ സമേതം കേരളത്തില്‍ എത്തിയ തനിക്ക് നേരിട്ട ദുരനുഭവം ലെവിറ്റ് തന്നെയാണ് തുറന്നു പറഞ്ഞത്. ദൈവത്തിന്റെ സ്വന്തം നാടും വിനോദ സഞ്ചാരികളുടെ പറുദീസയും കിഴക്കിന്റെ വെനീസും ഒക്കെ പരസ്യത്തില്‍ മാത്രമേയുള്ളൂവെന്ന് തിരിച്ചറിഞ്ഞു ലെവിറ്റ്.
സാമൂഹ്യവിരുദ്ധരാണ് തടഞ്ഞതെന്നും കര്‍ശന നടപടിയുണ്ടാവുമെന്നും ടൂറിസം മന്ത്രി വാചകക്കസര്‍ത്തിറക്കിയിട്ട് കാര്യമില്ല. പൊതുപണിമുടക്ക് എന്നു പറഞ്ഞ് നിര്‍ബന്ധിച്ച് കടയടപ്പിക്കുകയും വാഹനങ്ങള്‍ തടയുകയും ഭീഷണിപ്പെടുത്തി സഹകരിപ്പിക്കുകയും ചെയ്യുന്ന സംഘടനകള്‍ക്കെതിരെ നടപടിയെടുക്കാന്‍ ആര്‍ജവമുണ്ടോ നിങ്ങള്‍ക്ക്? നിയമവാഴ്ചയില്ലാത്ത നാടായി കേരളം മാറിയെന്ന് പറയിപ്പിക്കാന്‍ ഇടവരുത്തിയ സമരാഭാസക്കാര്‍ക്കെതിരെ ഉചിതമായ നടപടി പ്രവര്‍ത്തിച്ച് കാണിക്കൂ ഇനിയെങ്കിലും!
