തിരുവനന്തപുരം: കേന്ദ്ര സര്‍ക്കാര്‍ പ്രളയ ദുരിതാശ്വാസം നല്‍കിയില്ലെന്നുള്ള ധനമന്ത്രി തോമസ് ഐസക്കിന്റെയും എല്‍ഡിഎഫ് കണ്‍വീനര്‍ എ. വിജയരാഘവന്റെയും നിലപാടുകള്‍ തള്ളി വന്യൂ മന്ത്രി ഇ.ചന്ദ്രശേഖരന്‍. ഏഴ് സംസ്ഥാനങ്ങള്‍ക്ക് കേന്ദ്ര സഹായം ലഭിച്ചതിനാല്‍ കേരളത്തിന് പ്രളയ ദുരിതാശ്വാസം കിട്ടില്ലെന്നുള്ള പ്രചാരണത്തിന് അര്‍ത്ഥമില്ലെന്ന് അദേഹം പറഞ്ഞു.
2019ലെ പ്രളയക്കെടുതിയില്‍ കേരളം 2109 കോടി രൂപയുടെ കേന്ദ്രസഹായമാണ് ആവശ്യപ്പെട്ടത്. കേന്ദ്ര സര്‍ക്കാരിന്റെ ഇന്റര്‍ മിനിസ്റ്റീരിയല്‍ ടീം കേരളത്തിലെത്തി സ്ഥലങ്ങള്‍ സന്ദര്‍ശിച്ച് റിപ്പോര്‍ട്ട് കേന്ദ്രത്തിന് നല്‍കുകയും ചെയ്തിട്ടുണ്ട്. ഇപ്പോള്‍ പ്രഖ്യാപിച്ചതില്‍ കേരളത്തിന് കിട്ടിയില്ല എന്നത് ശരിയാണ്. എന്നാല്‍ രേഖാമൂലം കേരളത്തിന് മറിച്ച് അറിയിപ്പൊന്നും കിട്ടിയിട്ടില്ല. കേരളത്തിന് സഹായം നിഷേധിച്ചു എന്നു പറയാറായിട്ടില്ലെന്നും റവന്യൂമന്ത്രി വ്യക്തമാക്കി.
2018ലെ പ്രളയത്തില്‍ ഇവിടെ 488 പേര്‍ മരിച്ചപ്പോള്‍ 4700 കോടി രൂപയാണ് കേരളം ആവശ്യപ്പെട്ടത്. അന്ന് കേന്ദ്രം 3048.39 കോടി രൂപ തന്നു. ഇതുകൂടാതെ സംസ്ഥാന ദുരന്തനിവാരണ നിധിയിലേക്ക് കേന്ദ്രവിഹിതമായ 75 ശതമാനമാണ് കേന്ദ്രസര്‍ക്കാര്‍ വിവിധ സംസ്ഥാനങ്ങള്‍ക്ക് നല്‍കുകയെന്നും മന്ത്രി പറഞ്ഞു. പ്രളയദുരിതത്തെ അതിജീവിക്കാന്‍ ഒരു പണവും അധികമായി കേരളത്തിന് ലഭ്യമാകരുത് എന്നൊരു വാശി ബി.ജെ.പിയ്‌ക്കുണ്ടെന്നായിരുന്നു ധനമന്ത്രി തോമസ് ഐസക്ക് പറഞ്ഞത്. എന്നാല്‍, ഈ നിലപാട് തള്ളിയാണ് റവന്യൂമന്ത്രി രംഗത്തെത്തിയത്.
