കണ്ണൂര്: പരിയാരത്തെ കണ്ണൂര് ഗവ. മെഡിക്കല് കോളേജ് നാഥനില്ലാക്കളരിയായി മാറി. കോളേജ് സര്ക്കാര് ഏറ്റെടുത്തിട്ട് മാസങ്ങള് പിന്നിട്ടിട്ടും കാര്യങ്ങളെല്ലാം ഇപ്പോഴും പഴയപടി. സര്ക്കാര് മെഡിക്കല് കോളേജ് എന്ന പ്രഖ്യാപനം കടലാസില് മാത്രമായി ഒതുങ്ങുകയാണ്. സൗജന്യ ചികിത്സയും മരുന്നുകളും ലഭ്യമല്ലാത്തതും ആവശ്യത്തിന് വിദഗ്ധ ഡോക്ടര്മാരുടെ സേവനം ഇല്ലാത്തതും ഗുരുതരമായ പ്രശ്നങ്ങളാണ് മെഡിക്കല് കോളേജില് ഉണ്ടാക്കിയിരിക്കുന്നത്. ഉള്ള ഡോക്ടര്മാര് തന്നെ സ്വകാര്യ ചികിത്സ നടത്തുന്നു എന്ന ആരോപണവും ശക്തമാണ്. ഇത് കാരണം ചികിത്സയ്ക്കെത്തുന്ന രോഗികള് കടുത്ത ബുദ്ധിമുട്ട് അനുഭവിക്കുകയാണ്. ഗവണ്മെന്റ് മെഡിക്കല് കോളേജ് എന്ന നിലയിലേക്ക് ആശുപത്രിയെ മാറ്റാന് യാതൊരു നടപടിയും സര്ക്കാര് സ്വീകരിക്കുന്നില്ലെന്ന ആക്ഷേപം ശക്തമാവുകയാണ്. ആശുപത്രിയിലെ ഉപകരണങ്ങള് ഗുണനിലവാരമില്ലാത്ത രൂപത്തില് പഴകിയിട്ടും അത് മാറ്റാന് നടപടിയില്ല.
സാധാരണ ജനങ്ങള്ക്ക് കിട്ടേണ്ടുന്ന ചികിത്സാ ആനുകൂല്യങ്ങളും സഹായങ്ങളും ലഭ്യമാക്കാതെ പണം കൊടുത്താല് മാത്രം ചികിത്സ കിട്ടുന്ന വിധത്തിലാണ് ഇപ്പോഴും കാര്യങ്ങളുടെ അവസ്ഥയെന്നും ജനങ്ങള് പരാതിപ്പെടുന്നു. ജനങ്ങള്ക്ക് കുറഞ്ഞ നിരക്കില് മരുന്നുകള് ലഭ്യമാവുന്ന കാരുണ്യ ഫാര്മസി കൃത്യമായി തുറന്ന് പ്രവര്ത്തിപ്പിക്കാതെ നിരുത്തരവാദപരമായ സമീപനമാണ് മെഡിക്കല് കോളേജ് അധികൃതര് സ്വീകരിക്കുന്നത്. കേരളത്തിലെ മറ്റ് മെഡിക്കല് കോളേജുകളില് ആശുപത്രി വികസനസമിതിയുടെ പേരില് ഫാര്മസി പ്രവര്ത്തിപ്പിച്ച് കുറഞ്ഞ നിരക്കില് മരുന്നുകള് സാധാരണക്കാരായ പാവപ്പെട്ട രോഗികള്ക്ക് നല്കുകയും ഫാര്മസിയുടെ വരുമാനം ആശുപത്രിയുമായി ബന്ധപ്പെട്ട മറ്റ് ഭരണപരമായ കാര്യങ്ങള്ക്ക് വിനിയോഗിക്കുകയുമാണ്. ഇതൊഴിവാക്കി രാഷ്ട്രീയ താല്പ്പര്യത്തിന്റെ പേരില് കണ്ണൂര് മെഡിക്കല് കോളേജില് സ്വകാര്യസംരംഭങ്ങള് തുടങ്ങുകയാണ് ചെയ്തിട്ടുള്ളത്.
തൊഴിലാളികള്ക്ക് കൃത്യമായി ശമ്പളം പോലും നല്കാന് കഴിയാത്ത സ്ഥിതിയാണ് നിലവിലുളളത്. സര്ക്കാര് മെഡിക്കല് കോളേജ് എന്ന നിലയില് ജനങ്ങള്ക്ക് ആശുപത്രി സേവനങ്ങള് പൂര്ണ്ണമായും സൗജന്യമായി ലഭിക്കാത്ത സ്ഥിതിയാണ്. ഭരണപരമായ കെടുകാര്യസ്ഥത സിപിഎം ഭരണസമിതിയുടെ കാലത്തേതിന് സമാനമായി ഇപ്പോഴും നിലനില്ക്കുകയാണ്. ഉത്തര മലബാറിലെ പാവപ്പെട്ട ജനങ്ങളുടെ ആരോഗ്യ മേഖലയിലെ ആശ്രയ കേന്ദ്രമായ കണ്ണൂര് ഗവണ്മെന്റ് മെഡിക്കല് കോളേജിനെ പേരിന് മാത്രം സര്ക്കാര് മെഡിക്കല് കോളേജാക്കുന്ന സര്ക്കാര് നയം തിരുത്തണമെന്നും ജനങ്ങള്ക്ക് എല്ലാ സര്ക്കാര് മെഡിക്കല് കോളേജിലും ലഭ്യമാവുന്ന സേവനങ്ങള് കണ്ണൂര് മെഡിക്കല് കോളേജിലും അടിയന്തിരമായി ലഭ്യമാക്കണമെന്നുമാണ് ജനങ്ങളുടെ ആവശ്യം.
