ന്യൂദല്‍ഹി: ജെഎന്‍യുവില്‍ നടന്ന അക്രമങ്ങള്‍ ഗൂഢാലോചനയുടെ ഭാഗമാണെന്ന് കേന്ദ്ര വിദേശകാര്യ സഹമന്ത്രി വി. മുരളീധരന്‍. രാജ്യത്തെ ക്യാമ്പസുകളില്‍ മുഴുവന്‍ കലാപങ്ങളാണെന്ന ധാരണ പടര്‍ത്താന്‍ വേണ്ടിയിട്ടുള്ള ആസൂത്രിത നീക്കത്തിന്റെ ഭാഗമാണ് ജെഎന്‍യുവിലുണ്ടായതെന്നും അദ്ദേഹം പറഞ്ഞു. ദല്‍ഹിയില്‍ മാധ്യമപ്രവര്‍ത്തകരോട് സംസാരിക്കവെയാണ് അദ്ദേഹം ഈ കാര്യങ്ങള്‍ വ്യക്തമായത്.
ബിജെപിക്കെതിരായ, എബിവിപിക്കെതിരായ ആരോപണങ്ങളില്‍ അത്ഭുതമില്ല. കേരളത്തിലെ എത്രയോ കലാലയങ്ങളില്‍ അക്രമങ്ങള്‍ അഴിച്ചു വിട്ടതിന് ശേഷം അക്രമത്തിന് ഇരയായവരെ അക്രമികളാക്കി ചിത്രീകരിക്കുന്ന പാരമ്പര്യവും ചരിത്രവുമാണ് മാര്‍ക്‌സിസ്റ്റ് പാര്‍ട്ടിയുടേത്. യൂണിവേഴ്സ്റ്റി കോളേജിലടക്കം നടക്കുന്ന സംഭവങ്ങള്‍ എല്ലാവര്‍ക്കുമറിയാവുന്നതാണെന്നും വി. മുരളീധരന്‍ ചൂണ്ടിക്കാട്ടി.
സംഘടിതമായി ഇടതുപക്ഷ വിദ്യാര്‍ഥികളും തീവ്രവാദ വിദ്യാര്‍ഥികളും കോണ്‍ഗ്രസ് അനുകൂല വിദ്യാര്‍ഥികളും ജെഎന്‍യുവിലെ സാധാരണഗതിയിലുള്ള പ്രവര്‍ത്തനത്തെ തടസപ്പെടുത്താനാണ് ശ്രമിക്കുന്നത്. ജെഎന്‍യുവിലെ രജിസ്‌ട്രേഷന്‍ ഉള്‍പ്പടെയുള്ള കാര്യങ്ങളില്‍ തടസമുണ്ടാക്കുകയെന്നതുമാണ് ഈ അക്രമങ്ങള്‍ക്ക് പിന്നിലെ ഗൂഢലക്ഷ്യം.
സംഭവത്തെ കുറിച്ചുള്ള അന്വേഷണത്തിന് കേന്ദ്ര ആഭ്യന്തര മന്ത്രാലയം ഉത്തരവിട്ടു കഴിഞ്ഞു. കുറ്റവാളികളായിട്ടുള്ളവരെ നിയമത്തിന് മുന്നില്‍ കൊണ്ടു വന്ന് ശിക്ഷ നല്‍ക്കുന്നതിനുള്ള നടപടികള്‍ കേന്ദ്ര സര്‍ക്കാര്‍ കൈക്കൊള്ളുമെന്നും അദ്ദേഹം പറഞ്ഞു.
