തിരുവനന്തപുരം: പാലാരിവട്ടം പാലം നിര്മാണ അഴിമതി കേസില് വി.കെ. ഇബ്രാഹിം കുഞ്ഞിനെതിരെയുള്ള നടപടിയുമായി ബന്ധപ്പെട്ട് ഗവര്ണര് ആരിഫ് മുഹമ്മദ് എജിയെ വിളിച്ചു വരുത്തി. ഇബ്രാഹിം കുഞ്ഞിനെതിരെയുള്ള പ്രോസിക്യൂഷന് നടപടികളെ കുറിച്ച് ആരായുന്നതിനാണ് എജിയെ വിളിച്ചു വരുത്തിയത്.
മുന് മന്ത്രിയെ ചോദ്യം ചെയ്യുന്നതുമായി ബന്ധപ്പെട്ട് വിജിലന്സ് സര്ക്കാരിനെ സമീപിച്ചെങ്കിലും നടപടി ആയിട്ടില്ല. സര്ക്കാരിന്റെ മെല്ലപ്പോക്കിനെതിരെ രൂക്ഷമായി വിമര്ശനങ്ങള് ഉയര്ന്നതിനെ തുടര്ന്നാണ് ഗവര്ണര് രാജ്ഭവനിലേക്ക് എജിയെ വിളിച്ചു വരുത്തുന്നത്.
പാലാരിവട്ടം പാലം നിര്മ്മാണ അഴിമതി കണ്ടെത്തിയിട്ടും അതില് നടപടി സ്വീകരിക്കാന് കാലതാമസം ഉണ്ടാകുന്നതിനു പിന്നില് രാഷ്ട്രീയ ഇപെടലുകളാണെന്നാണ് ആരോപണം.
കേസില് ഇബ്രാഹിം കുഞ്ഞിനെതിരെ തെളിവുണ്ടെന്നും അതിനാല് പ്രോസിക്യൂഷന് അനുമതി നല്കണമെന്നും ആവശ്യപ്പെട്ട് മൂന്നു മാസം മുമ്പാണ് വിജിലന്സ് കത്ത് നല്കിയത്. എംഎല്എ ആയതിനാല് തുടര് നടപടിക്കായി സര്ക്കാര് ഗവര്ണര്ക്ക് കൈമാറി. എന്നാല് ഇതുസംബന്ധിച്ചുള്ള വിശദാംശങ്ങള് ഗവര്ണര് മൂന്നു തവണ സര്ക്കാരിനോട് ആവശ്യപ്പെട്ടെങ്കിലും നല്കിയിട്ടില്ല. തുടര്ന്ന് ആരിഫ് മുഹമ്മദ് സ്വന്തം നിലയിലും റിപ്പോര്ട്ട് തേടിയെങ്കിലും സര്ക്കാരിന്റെ ഭാഗത്തു നിന്നും ഒരു നടപടിയും ഉണ്ടായില്ല. അതിനാല് പ്രോസിക്യൂഷന് അനുമതി നല്കാനാവാതെ കെട്ടിക്കിടക്കുന്ന സാഹചര്യത്തിലാണ് ഗവര്ണര് എജിയോട് വിശദാംശങ്ങള് തേടിയിരിക്കുന്നത്.
അതേസമയം പ്രോസിക്യൂഷന് നടപടികളില് എജിയുടെ അഭിപ്രായം അറിയാനാണ് ഗവര്ണര് വിളിച്ചു വരുത്തുന്നതെന്നാണ് സൂചന. അധികം വൈകാതെ തന്നെ മുന് മന്ത്രി ഇബ്രാഹിം കുഞ്ഞിനെതിരായ പ്രോസിക്യുഷന് നടപടിയില് തീരുമാനമുണ്ടാകുമെന്നാണ് കരുതുന്നത്.
