കോഴിക്കോട്: കണ്ണൂരില് ചരിത്ര കോണ്ഗ്രസില് ഗവര്ണര് ആരിഫ് മുഹമ്മദ് ഖാനു നേരെയുണ്ടായ അക്രമത്തില് കേസെടുക്കാത്തത് അപലപനീയമെന്ന് മിസോറം ഗവര്ണര് പി.എസ്. ശ്രീധരന്പിള്ള. കോഴിക്കോട്ടെ വസതിയില് മാധ്യമങ്ങളോട് സംസാരിക്കുകയായിരുന്നു അദ്ദേഹം.
ഇക്കാര്യത്തില് ആഭ്യന്തര മന്ത്രി കൂടിയായ മുഖ്യമന്ത്രി നിലപാട് വ്യക്തമാക്കണം. സംസ്ഥാന സര്ക്കാരിന്റെ നടപടി അപലപനീയവും ആപത്കരവുമാണ്. വേദിയില് ഇര്ഫാന് ഹബീബ് കാണിച്ചത് ക്രിമിനല് കുറ്റമാണ്. എന്നാല്, അദ്ദേഹത്തെ സംരക്ഷിക്കുന്ന നിലപാടാണ് സംസ്ഥാന സര്ക്കാര് സ്വീകരിക്കുന്നത്.
ഗവര്ണര് പങ്കെടുക്കുന്ന പരിപാടിക്ക് പ്രോട്ടോകോളുണ്ട്. പങ്കെടുക്കുന്നവരുടെയും പ്രസംഗിക്കുന്നവരുടെയും പട്ടിക നേരത്തെ തയാറാക്കുന്നതാണ്. പരിപാടിയുടെ പട്ടികയില് ഇല്ലാത്തയാള് എങ്ങനെ വേദിയില് എത്തിയെന്നത് അന്വേഷിക്കണം. ഗവര്ണര്ക്കു നേരെ ഇയാള് പാഞ്ഞടുക്കുകയായിരുന്നു. ഗവര്ണറുടെ എഡിസിയെ തള്ളിമാറ്റിയാണ് അക്രമം കാണിച്ചത്. അക്രമികള്ക്കെതിരെ നിയമ നടപടിയെടുക്കാത്ത സാഹചര്യത്തിലേക്കാണ് കേരളം നീങ്ങുന്നത്. ഗവര്ണറെ പരിപാടിക്ക് ക്ഷണിച്ച് അവഹേളിക്കുന്ന അവസ്ഥ മറ്റൊരു സംസ്ഥാനത്തുമില്ല. രാജ്യത്തെ 28 സംസ്ഥാനങ്ങളില് ഗവര്ണര്മാര്ക്കെതിരെ കരിങ്കൊടി കാണിച്ചത് കേരളത്തിലും ബംഗാളിലുമാണ്.
പൗരത്വ വിഷയം കേന്ദ്ര സര്ക്കാര് കൈകാര്യം ചെയ്യുന്ന വിഷയമാണ്. രാജ്യത്തെ എല്ലാ ഗവര്ണര്മാര്ക്കും ഈ വിഷയത്തില് ഒരേ നിലപാടാണ്. ആരിഫ് മുഹമ്മദ് ഖാന് ഇസ്ലാമിനെ കുറിച്ച് വിഖ്യാതമായ ഗ്രന്ഥം രചിച്ച വ്യക്തിയാണ്. രാജ്യത്ത് പൊതുപ്രവര്ത്തനത്തില് സ്ഫുടം ചെയ്തെടുത്ത അപൂര്വ വ്യക്തിത്വത്തിന്റെ ഉടമയാണ് ആരിഫ് മുഹമ്മദ് ഖാന്. നീതിക്കു വേണ്ടിയാണ് അദ്ദേഹം എക്കാലത്തും ശബ്ദമുയര്ത്തിയിട്ടുള്ളതെന്നും ശ്രീധരന്പിള്ള പറഞ്ഞു.
കേരളത്തില് താന് നടത്തിയ സന്ദര്ശനത്തിനിടയില് മൂന്ന് ക്രിസ്മസ് ആഘോഷങ്ങളില് സംബന്ധിച്ചിരുന്നു. ഗവര്ണറുടെ പരിപാടി വിജയിപ്പിക്കാന് വിവിധ ക്രൈസ്തവ സഭകള് ഇടയ ലേഖനം ഇറക്കുകയുണ്ടായി. ചില പരിപാടികള് പ്രതിഷേധത്തില് മുക്കാന് ശ്രമം നടന്നിരുന്നുവെങ്കിലും അതെല്ലാം ജനങ്ങള് നിരാകരിച്ചുവെന്നും ശ്രീധരന്പിള്ള പറഞ്ഞു.
