ന്യൂദല്ഹി: മുഖ്യമന്ത്രി പിണറായി വിജയന്റെ ഭരണഘടനാ വിരുദ്ധ പ്രവര്ത്തനങ്ങള്ക്കെതിരെ ബിജെപി കേന്ദ്രനേതൃത്വം നീക്കങ്ങള് ശക്തമാക്കി. പൗരത്വ ഭേദഗതി നിയമത്തിനെതിരെ പ്രമേയം അവതരിപ്പിച്ച് നിയമസഭയില് പിണറായി നടത്തിയ പ്രസംഗത്തിനെതിരെ രാജ്യസഭാ അവകാശലംഘന സമിതിയംഗമായ ജിവിഎല് നരസിംഹറാവു എം.പി രാജ്യസഭാധ്യക്ഷന് അവകാശലംഘന നോട്ടീസ് നല്കി. വെള്ളിയാഴ്ച രാജ്യസഭയുടെ അവകാശലംഘന സമിതി വിഷയം പരിഗണിക്കും. പിണറായിക്കെതിരെ നടപടി വേണമെന്നാണ് ബിജെപിയുടെ ആവശ്യം.
പൗരത്വ ഭേദഗതി നിയമം നിയമവിരുദ്ധവും ഭരണഘടനാവിരുദ്ധവുമാണെന്ന പിണറായിയുടെ ഇന്നലത്തെ നിയമസഭാ പ്രസംഗത്തിന്റെ അടിസ്ഥാനത്തിലാണ് പരാതി. പാര്ലമെന്റിന്റെ ഇരുസഭകളും പാസാക്കിയ നിയമത്തിനെതിരെ സംസ്ഥാന നിയമസഭ പ്രമേയം പാസാക്കിയതും രാജ്യസഭ പാസാക്കിയ നിയമത്തെ നിയമവിരുദ്ധമെന്ന് ആക്ഷേപിച്ചതും അവകാശലംഘന പരിധിയില് വരുമെന്ന് നരസിംഹറാവു വ്യക്തമാക്കി. പാര്ലമെന്റിന്റെ അധികാരത്തിന്മേല് കൈകടത്താന് കേരള മുഖ്യമന്ത്രിക്ക് എന്തവകാശമെന്നും രാജ്യസഭാ അധ്യക്ഷന് കൂടിയായ ഉപരാഷ്ട്രപതി എം. വെങ്കയ്യ നായിഡുവിന് കൈമാറിയ പരാതിയില് ജിവിഎല് ചോദിക്കുന്നു.
നിയമം ഭരണഘടനാ വിരുദ്ധമാണെന്നും കേരളത്തില് നടപ്പാക്കില്ലെന്നും പിണറായി പറഞ്ഞതായും പാര്ലമെന്റ് പാസാക്കിയ നിയമത്തിനെതിരെ പ്രതിഷേധം നടത്താന് ആവശ്യപ്പെട്ടതായും പരാതിയിലുണ്ട്. ഭരണഘടനയുടെ 105-ാം അനുച്ഛേദ പ്രകാരം പാര്ലമെന്റിന്റെ അവകാശങ്ങളിന്മേലാണ് കൈകടത്തിയത്. ഭരണഘടനാ പരമായ അരാജകത്വത്തിലേക്ക് വഴിവയ്ക്കുന്ന നടപടി ഇരുസഭകളിലും ഉന്നയിക്കും, പരാതിയില് വ്യക്തമാക്കി.
കേരളാ നിയമസഭയുടെ വിചിത്ര നടപടിക്കെതിരെ ബിജെപി എംപിമാര് പാര്ലമെന്റിന്റെ ഇരുസഭകളെയും സമീപിക്കും. രാജ്യസഭാ അവകാശ ലംഘന സമിതി പിണറായിയുടെ പ്രസംഗം ചര്ച്ച ചെയ്യും. ലോക്സഭാ സമിതിയും ഇക്കാര്യം പരിഗണിക്കും. അവകാശ ലംഘനമെന്ന് സമിതി വിലയിരുത്തിയാല് ബജറ്റ് സമ്മേളനത്തില് തുടര് നടപടികളുണ്ടാവും.
ജന്മഭൂമി ഓണ്ലൈന്