കറാച്ചി: ഭരണകൂടത്തിനെതിരെയുള്ള ലേഖനങ്ങള്‍ കൈവശം വച്ചതിനു മതവിദ്വേഷം പ്രചരിപ്പിച്ചതിന്റെ പേരിലും തീവ്രവാദം പ്രോത്സാഹിപ്പിച്ചതിന്റെ പേരിലും പാകിസ്ഥാന്‍ മാധ്യമ പ്രവര്‍ത്തകന് 5 വര്‍ഷം തടവുശിക്ഷ. ഉറുദു പത്രമായ നയാബാത്തിലെ മാധ്യമപ്രവര്‍ത്തകനായ നസറുല്ല ഖാന്‍ ചൗധരി ക്കാണ് പാകിസ്ഥാനിലെ ഭീകരവിരുദ്ധ കോടതി 5 വര്‍ഷം തടവും പതിനായിരം രൂപ പിഴയും വിധിച്ചിരിക്കുന്നത്.
2018 നവംബര്‍ മാസം പതിനൊന്നിന് കറാച്ചിയിലെ ഗാര്‍ഡന്‍ ഏര്യയില്‍ നിന്നാണ് ചൗധരി പിടിയിലാകുന്നത്. ആറ് മാസം തടവും 5000 രൂപ പിഴയും ആണ് ആദ്യം ശിക്ഷയായി വിധിച്ചതെങ്കിലും തീവ്രവാദ വിരുദ്ധ കോടതി ജാമ്യം റദ്ദാക്കി ജയിലേക്ക് അയക്കുകയായിരുന്നു. ജിഹാദിന് ആഹ്വാനം ചെയ്യുന്നതും മതവിദ്വേഷം ജനിപ്പിക്കുന്നതുമായ അഫ്ഗാനിസ്ഥാനിലെ ജിഹാദിനെക്കുറിച്ചുള്ളതും പാക് പഞ്ചാബിലെ താലീബാന്റേയും ലഘുലേഖകളാണ് കൈവശമുണ്ടായിരുന്നത് എന്നാണു കുറ്റപത്രത്തില്‍ പറയുന്നത്. തീവ്രവാദ വിരുദ്ധ നിയമങ്ങളായ 1997 ലെ സെക്ഷന്‍ 11 എഫ് (ഐ), സെക്ഷന്‍ 7 എന്നിവ പ്രകാരമുള്ള കുറ്റങ്ങളാണ് ചുമഴ്‌ത്തിയിരിക്കുന്നത്. അല്‍ക്വയ്ദ നേതാവ് ഖാലിയുമായി ചൗധരിക്ക് ബന്ധമുള്ളതായും കുറ്റപത്രത്തില്‍ പറയുന്നുണ്ട്.
അതേസമയം, വിഷയത്തില്‍ പത്രപ്രവര്‍ത്തക സംഘടനകളായ പാകിസ്ഥാന്‍ ഫെഡറല്‍ യൂണിയന്‍ ഓഫ് ജേര്‍ണലിസ്റ്റും കറാച്ചി യൂണിയന്‍ ഓഫ് ജേര്‍ണലിസ്റ്റും സംഭവത്തില്‍ ആശങ്ക പ്രകടിപ്പിച്ച് രംഗത്ത് വന്നു. ഭരണകൂടം മാധ്യമപ്രവര്‍ത്തകരെ പീഡിപ്പിക്കുകയാണെന്ന് അവര്‍ ആരോപിച്ചു.
