ന്യൂദല്‍ഹി: പൗരത്വ ഭേദഗതി നിയമത്തിനെതിരേ ചില പ്രതിഷേധങ്ങള്‍ തുടരുന്നതിനിടെയിലും നിയമത്തിനു സമൂഹമാധ്യമങ്ങളില്‍ വന്‍പിന്തുണയേറുന്നു. പൗരത്വഭേദഗതി നിയമത്തിനൊപ്പം ഇന്ത്യ എന്ന ട്വിറ്റര്‍ ഹാഷ് ടാഗ് റെക്കോര്‍ഡുകള്‍ ഭേദിച്ചു മുന്നോട്ടു പോവുകയാണ്. ആറു മണിക്കൂറിനുള്ളില്‍ രണ്ടു ലക്ഷത്തിലധികം പേര്‍ ഇതിനകം നിയമത്തെ അനുകൂലിച്ചുള്ള ടാഗുകളുമായി എത്തിയിട്ടുണ്ട്. ഇന്ത്യയില്‍ അടുത്ത കാലത്ത് ഉണ്ടായ ഏറ്റവം വലിയ ട്വിറ്റര്‍ ട്രെന്‍ഡിംഗ് കൂടിയാണ് ഇത്.
സിഎഎയ്‌ക്ക് എതിരായ സമരങ്ങള്‍ക്കെതിരെ സോഷ്യല്‍ മീഡിയയില്‍ അടക്കം വലിയ പ്രതിഷേധമാണ് ഉയരുന്നത്. പ്രതിഷേധിക്കാന്‍ അവകാശമുണ്ടെങ്കിലും അക്രമങ്ങളും, ഭീതി വിതക്കലുമാണ് പ്രതിഷേധമെന്ന പേരില്‍ നടക്കുന്നതെന്നാണ് ആരോപണം. വിഭജന സമയത്ത് പാക്കിസ്ഥാനില്‍ അവരാഗ്രഹിക്കാതെ പെട്ടുപോയ ന്യൂനപക്ഷങ്ങളെ സംരക്ഷിക്കണമെന്ന വാക്ക് ഗാന്ധിജിയും നെഹ്‌റുവും നല്‍കിയതാണ്. വിഭജനം കഴിഞ്ഞ് ഇത്രയും വര്‍ഷമായിട്ടും പീഡനം തുടരുന്ന സാഹചര്യത്തില്‍ അത് ഇന്നും പ്രസക്തമാണ്. ഇന്ത്യ ഏറ്റെടുക്കേണ്ട മനുഷ്യാവകാശ സംരക്ഷണവുമായി ബന്ധപ്പെട്ട ഏറ്റവും വലിയ ഉത്തരവാദിത്തമാണ് പാക്കിസ്ഥാന്‍-ബംഗ്ലാദേശ് തുടങ്ങിയ രാജ്യങ്ങളിലെ ന്യൂനപക്ഷ സംരക്ഷണമെന്നാണ് വിലയിരുത്തല്‍. അത് യാഥാര്‍ത്ഥ്യമാക്കുന്ന സിഎഎയെ എതിര്‍ക്കുന്നവര്‍ രാജ്യവിരുദ്ധ നിലപാടുകളെ കൂടി പിന്തുണക്കുന്നവരാണെന്നാണ് സിഎഎയെ അനുകൂലിക്കുന്നവര്‍ ചൂണ്ടിക്കാട്ടുന്നത്. ഒപ്പം, നിയമത്തെ സംബന്ധിച്ച പാവങ്ങള്‍ക്കിടയില്‍ വന്‍തോതില്‍ തെറ്റിദ്ധാരണ പരത്താനും അക്രമം അഴിച്ചുവിടാനും പ്രതിപക്ഷവും തീവ്രമുസ്ലിം സംഘടനകളും ശ്രമിക്കുന്നുവെന്നും സോഷ്യല്‍മീഡിയ ആരോപിക്കുന്നു.
