തൊടുപുഴ: ഇസ്ലാമിക തീവ്രവാദികള് വെട്ടിമാറ്റിയ വലതു കൈയ്ക്ക് സ്വാധീനമില്ലെങ്കിലും ഇടതു കൈയിലെ മൂന്ന് വിരലുകള് കൊണ്ട് ടി.ജെ. ജോസഫ് എന്ന അധ്യാപകന് തന്റെ ജീവിത കഥ എഴുതി പൂര്ത്തിയാക്കി. രണ്ട് മാസത്തിനുള്ളില് പുസ്തകം പുറത്തിറങ്ങും.
ബിരുദ ചോദ്യപേപ്പറില് പ്രവാചകനെ അവഹേളിച്ചുവെന്ന് ആരോപിച്ച് 2010 ജൂലൈ നാലിനാണ് തൊടുപുഴന്യൂമാന് കോളേജിലെ മലയാളം അധ്യാപകനായിരുന്ന ജോസഫിന്റെ വലതു കൈ ഇസ്ലാമിക തീവ്രവാദികള് വെട്ടിയെടുത്തത്.
ജീവിതത്തിലെ ഭൂരിഭാഗം സമയവും അധ്യാപകവൃത്തിയില് ഏര്പ്പെട്ടിരുന്ന അദ്ദേഹത്തെ പ്രവാചക നിന്ദയുടെ പേരില് ആക്രമിച്ചപ്പോള് നഷ്ടമായത് അദ്ദേഹത്തിന്റെ കൈപ്പത്തി മാത്രമല്ല, മറിച്ച് താന് നയിച്ച സന്തോഷമുള്ള ജീവിതം കൂടിയായിരുന്നു. തുടര്ന്ന് കടന്നുപായ വൈകാരികമായ ജീവിതാനുഭവങ്ങളാണ് രണ്ട് ഭാഗങ്ങളുള്ള പുസ്തകത്തില് അദ്ദേഹം കുറിച്ചിടുന്നത്.
പുസ്തകത്തിന്റെ ഒന്നാം ഭാഗത്തില് പ്രവാചകനെ അവഹേളിച്ചുവെന്ന് ആരോപിക്കുന്ന ചോദ്യവും അതിന്റെ പിന്നിലുള്ള ചിന്താഗതിയും തുടര്ന്നുണ്ടായ സംഭവവികാസങ്ങളുമാണ് ഉള്പ്പെടുത്തിയിരിക്കുന്നതെന്ന് ജോസഫ് പറയുന്നു. എന്തായിരുന്നു ചോദ്യം എന്ന് വെളിപ്പെടുത്തിക്കൊണ്ടാണ് പുസ്തകത്തിന്റെ ആദ്യ ഭാഗത്തിലെ ഒന്നാം അധ്യായം തുടങ്ങുന്നത്.
ചോദ്യത്തിന് വിശദീകരണം കൊടുത്തതും, കോളേജ് മാനേജ്മെന്റ് ഒളിവില് പോകാന് നിര്ദേശിച്ചതും, ജയില്വാസവും, ജോലിയില് നിന്ന് സസ്പെന്ഡ് ചെയ്തതും, മതതീവ്രവാദികള് ആക്രമിച്ചതും, കോളേജില് നിന്ന് പുറത്താക്കിയതും, പ്രതികളുടെ അറസ്റ്റും, ഭാര്യയുടെ ആത്മഹത്യയും, കോടതി കുറ്റവിമുക്തനാക്കിയതും അടക്കമുള്ള പ്രധാന അനുഭവങ്ങള് ഒന്നാം ഭാഗത്തിലുണ്ട്.
രണ്ടാം ഭാഗത്തില് തന്റെ പൂര്വാശ്രമത്തെക്കുറിച്ചാണ് അദ്ദേഹം വാചാലനാകുന്നത്. ബാല്യവും, വിദ്യാഭ്യാസവും, അധ്യാപക ജീവിതവും, തന്റെ കാഴ്ചപ്പാടുകളുമാണ് ഉള്പ്പെടുത്തിയത്. ഒരോ വിഷയത്തിലും സ്വതന്ത്രമായ ലേഖനങ്ങളുമുണ്ട്.
രണ്ടാം ഭാഗം കൊണ്ട് തന്റെ യഥാര്ത്ഥ നിലപാടുകള്, കാഴ്ചപ്പാടുകള് ജനങ്ങളെ ബോധ്യമാക്കുകയെന്നതും അദ്ദേഹം ലക്ഷ്യമിടുന്നു. 670 പേജുള്ള പുസ്തകത്തിന് പേര് മനസിലുണ്ടെങ്കിലും പ്രസാധകരുമായി ആലോചിച്ചതിന് ശേഷമേ ഔദ്യോഗികമായി പേരിടൂയെന്നും അദ്ദേഹം വ്യക്തമാക്കി.
ജന്മഭൂമി ഓണ്ലൈന്