ന്യൂദല്‍ഹി : 2022 ഓടെ തദ്ദേശീയമായി നിര്‍മിച്ചിട്ടുള്ള ഉത്പ്പന്നങ്ങളിലേക്ക് നമുക്ക് പൂര്‍ണ്ണമായും മാറാനാകുമെന്ന് പ്രതിജ്ഞെയെടുക്കാമെന്ന് പ്രധാനമന്ത്രി നരേന്ദ്രമോദി. പ്രതിമാസ റേഡിയോ പരിപാടിയായ മന്‍ കി ബാത്തില്‍ സംസാരിക്കുകായിരുന്നു അദ്ദേഹം. അറുപതാമത്തേതും ഈ വര്‍ഷത്തെ അവസാനത്തേതുമായ മന്‍ കി ബാത്തില്‍ സംസാരിക്കവേയാണ് ഇത്തരത്തില്‍ ആഹ്വാനം ചെയ്തത്.
2022ല്‍ നമുക്ക് സ്വാതന്ത്ര്യം നേടിയിട്ട് 75 വര്‍ഷം തികയും. പലരുടേയും ത്യാഗമാണ് നമ്മുടെ സ്വാതന്ത്ര്യം. അഭിവൃദ്ധി പ്രാപിച്ച, സ്വാതന്ത്ര്യം നേടിയ ഇന്ത്യ അവരുടെ സ്വപ്‌നമായിരുന്നു. മെയ്‌ക് ഇന്‍ ഇന്ത്യ പദ്ധതിയിലൂടെ നമുക്ക് അവരുടെ സ്വപ്‌നം നമുക്ക് സാക്ഷാത്കരിക്കാം. ഇന്ത്യയില്‍ തന്നെ നിര്‍മിച്ചിട്ടുള്ള വസ്തുക്കള്‍ ഉപയോഗിക്കൂവെന്ന് നമുക്ക് തീരുമാനമെടുക്കാമെന്നും അദ്ദേഹം അറിയിച്ചു.
തദ്ദേശീയമായി നിര്‍മിച്ച വസ്തുക്കളേ നമ്മള്‍ ഉപയോഗിക്കൂ എന്ന് തീരുമാനമെടുത്താല്‍ അത് വ്യവസായ മേഖലകള്‍ക്ക് പുതിയ ഊര്‍ജ്ജം നല്‍കുന്നതായിരിക്കും. മെയ്‌ക് ഇന്‍ ഇന്ത്യ വഴി കോടികളുടെ നിക്ഷേപമാണ് ഉണ്ടായിട്ടുള്ളത്. ഇതിലൂടെ കയറ്റുമതിക്ക് പ്രോത്സാഹനം നല്‍കുന്നുണ്ടെങ്കിലും ഇന്ത്യയില്‍ തന്നെ ആവശ്യം വര്‍ധിക്കുന്നത് വിപണിയെ കൂടുതല്‍ വളര്‍ച്ചയിലേക്ക് നയിക്കുമെന്നും മോദി പറഞ്ഞു.
അതേസമയം സ്വാമി വിവേകാനന്ദന്‍ യുവാക്കളില്‍ പ്രതീക്ഷയര്‍പ്പിച്ചത് പോലെ താനും അതില്‍ വിശ്വസിക്കുന്നെന്ന് പ്രധാനമന്ത്രി അറിയിച്ചു. യുവാക്കളുടെ മൂല്യത്തെ വിഭജിക്കാന്‍ കഴിയില്ലെന്ന സ്വാമി വിവേകാനന്ദന്റെ വാക്കുകളെ അനുസ്മരിച്ച അദ്ദേഹം, ഇന്നത്തെ തലമുറയ്‌ക്ക് എല്ലാ വിഷയങ്ങളിലും സ്വന്തമായി അഭിപ്രായമുണ്ടെന്നും അറിയിച്ചു. കൂടാതെ വിവേകാനന്ദപ്പാറയുടെ അമ്പതാം വാര്‍ഷികത്തില്‍ സാധിക്കുമെങ്കില്‍ അവിടെ സന്ദര്‍ശിക്കാനും അഭ്യര്‍ത്ഥിച്ചു.
