കരുനാഗപ്പള്ളി: കേന്ദ്ര വിദേശകാര്യ സഹമന്ത്രി വി. മുരളീധരന് ഡോ. അജിത്ത് ശ്രീധരന്റെ കരുനാഗപ്പള്ളിയിലുള്ള വീട് സന്ദര്ശിച്ചു. ക്രിസ്മസ് ദിനത്തില് ഉച്ചയ്ക്ക് 12 മണിയോടെ ഇവിടെയെത്തിയ കേന്ദ്രമന്ത്രി അരമണിക്കൂറോളം ഡോക്ടറുടെ വീട്ടില് ചെലവഴിച്ചു. ദോഹയിലുണ്ടായ വിഷയവുമായി ബന്ധപ്പെട്ടുള്ള വിവരങ്ങള് ഡോ. അജിത്ത് ശ്രീധരനില് നിന്ന് മന്ത്രി ചോദിച്ചറിഞ്ഞു.
പാര്ലമെന്റ് പാസാക്കിയ ഭേദഗതിയുമായി ബന്ധപ്പെട്ട കാര്യങ്ങള് കേന്ദ്ര ആഭ്യന്തര മന്ത്രി അമിത് ഷായും മന്ത്രി പ്രകാശ് ജാവ്ദേക്കറും വ്യക്തമാക്കിയിട്ടുള്ളതാണെന്ന് വി. മുരളീധരന് മാധ്യമങ്ങളോടു പറഞ്ഞു. ഊഹാപോഹങ്ങള്ക്കും കെട്ടുകഥകള്ക്കും വശംവദരാകാതെ നിയമത്തിന്റെ അന്തസ്സത്ത ശരിയായ വിധത്തില് മനസിലാക്കാന് സമരം ചെയ്യുന്നവര് തയാറാകണം. ഇതിന്റെ പേരില് വിദേശ രാജ്യങ്ങളില് ഇന്ത്യാവിരുദ്ധ പ്രവര്ത്തനങ്ങള് നടക്കുന്നതായുള്ള റിപ്പോര്ട്ടുകള് ശ്രദ്ധയില്പ്പെട്ടിട്ടില്ലെന്നും ശ്രദ്ധയില്പ്പെട്ടാല് അപ്പോള് പ്രതികരിക്കാമെന്നും ചോദ്യങ്ങള്ക്കു മറുപടിയായി അദ്ദേഹം പറഞ്ഞു.
