തിരുവനന്തപുരം: സിനിമ പ്രവര്‍ത്തകര്‍ക്കെതിരെയുള്ള ബിജെപിയുടെ നിലപാട് സംസ്ഥാന ജനറല്‍ സെക്രട്ടറി എം ടി.രമേശ് വിശദീകരിച്ചത് എഡിറ്റ് ചെയ്ത പ്രസിദ്ധീകരിച്ച മാധ്യമങ്ങള്‍ക്കെതിരെ യുവമോര്‍ച്ച സംസ്ഥാന സെക്രട്ടറി സന്ദീപ് ജി. വാര്യര്‍. ബിജെപിയുടെ നിലപാട് സംസ്ഥാന ജനറല്‍ സെക്രട്ടറി എം ടി.രമേശ് പറയുന്നതാണ്. രമേശേട്ടന്‍ എന്നെ തള്ളി പറഞ്ഞു എന്നൊക്കെ വാര്‍ത്ത കൊടുത്തവര്‍ അദ്ദേഹം പറഞ്ഞത് ഒന്നുകൂടി വ്യക്തമായി കേള്‍ക്കുന്നത് നന്നായിരിക്കും. ‘വ്യക്തിപരമായ അഭിപ്രായ പ്രകടനം നടത്താന്‍ എല്ലാവര്‍ക്കും സ്വാതന്ത്ര്യമുണ്ട്. രാഷ്‌ട്രീയ വിമര്‍ശനം നടത്തുന്നവര്‍ അത് കേള്‍ക്കുമ്പോഴും സഹിഷ്ണുത കാണിക്കണം’. ഇത്രയും വാചകങ്ങള്‍ കൂടി രമേശേട്ടന്‍ പറഞ്ഞിട്ടുണ്ട്. പാര്‍ട്ടി സന്ദീപിനെ തള്ളിപ്പറയുകയല്ല ചേര്‍ത്തു പിടിക്കുകയാണ് ചെയ്തിരിക്കുന്നത്.
പുന്നാര പത്രക്കാരെ, എന്റെ ഫേസ്ബുക്ക് പേജ് എന്റെ സ്വന്തമായ അഭിപ്രായങ്ങള്‍ പ്രകടിപ്പിക്കാനുള്ള ഇടമാണ്. അവനവന്‍ എഡിറ്ററായ ലോകത്തെ ഏക ഇടമാണ് സാമൂഹ്യ മാധ്യമങ്ങളെന്നും സന്ദീപ് ഫേസ്ബുക്ക് പോസ്റ്റില്‍ പറയുന്നു. സിനിമ പ്രവര്‍ത്തകരെ ഭീഷണിപ്പെടുത്തിയിട്ടില്ല. നികുതി അടയ്‌ക്കാത്തവര്‍ക്ക് സ്വാഭാവികമായി അതൊരു ഭീഷണിയായി തോന്നിയേക്കാം. ‘ഇത് എന്നെ ഉദ്ദേശിച്ചാണ് എന്നെ മാത്രം ഉദ്ദേശിച്ചാണ്’ ആര്‍ക്കെങ്കിലുമൊക്കെ തോന്നിയിട്ടുണ്ടെങ്കില്‍ നന്നായിപ്പോയെന്നും അദേഹം പറഞ്ഞു.
കേന്ദ്ര സര്‍ക്കാര്‍ പാസാക്കിയ പൗരത്വ ഭേദഗതി നിയമത്തിനെതിരേ കൊച്ചിയില്‍ ജാഥ നടത്തുകയും പ്രസംഗിക്കുകയും ചെയ്ത സിനിമക്കാരെ സന്ദീപ് നേരത്തെ വിമര്‍ശിച്ചിരുന്നു. പൊളിറ്റിക്കല്‍ സ്റ്റേറ്റ്‌മെന്റ് നടത്തുന്ന നടിമാരുടെ ശ്രദ്ധക്കണം. ഇന്‍കംടാക്‌സ് ഒക്കെ അടയ്‌ക്കുന്നെന്ന് ഉറപ്പാക്കണം, കയ്യോടെ പിടിച്ചാല്‍ ജാഥ നടത്താന്‍ കഞ്ചാവ് ടീംസ് ഒന്നുമുണ്ടാവില്ലെന്നും അദേഹം ഓര്‍മിപ്പിച്ചിരുന്നു. നടി നിമിഷ സജയന്‍, റിമ കല്ലിങ്കല്‍ അടക്കം ചില നടിമാര്‍ കഴിഞ്ഞ ദിവസം കൊച്ചിയില്‍ നടന്ന ജാഥയില്‍ പങ്കെടുത്ത് പ്രസംഗിച്ചിരുന്നു.
