മട്ടന്നൂര്‍: കണ്ണൂര്‍ വിമാനത്താവളത്തില്‍ 16 ലക്ഷം രൂപയുടെ സ്വര്‍ണം മലദ്വാരത്തിലൂടെ കടത്താന്‍ ശ്രമിച്ച യുവാവ് അറസ്റ്റില്‍. കഴിഞ്ഞ ദിവസം രാവിലെ മസ്‌കറ്റില്‍നിന്നെത്തിയ എയര്‍ ഇന്ത്യ എക്‌സ്പ്രസ് വിമാനയാത്രക്കാരനായ കോഴിക്കോട് പുതുപ്പാടി സ്വദേശി ജംഷീറാണ് പിടിയിലായത്. ഇയാളില്‍ നിന്ന് 421 ഗ്രാം സ്വര്‍ണമാണ് പിടിച്ചെടുത്തത്. പേസ്റ്റ് രൂപത്തിലാണ് സ്വര്‍ണം മലദ്വാരത്തില്‍ ഒളിപ്പിച്ച് കടത്താന്‍ ശ്രമിച്ചത്.
വ്യാഴാഴ്ച കണ്ണൂര്‍ വിമാനത്താവളത്തില്‍നിന്ന് 75 ലക്ഷം രൂപയുടെ സ്വര്‍ണം കസ്റ്റംസ് പിടിച്ചിരുന്നു. അതേസമം മംഗലാപുരം വിമാനത്താവളത്തില്‍ നിന്നും സര്‍ണവുമായി മലയാളി ഇന്നലെ രാത്രി പിടിയിലായി. കാസര്‍കോട് ഉപ്പള നൂറിയ മന്‍സിലില്‍ അബ്ദുള്‍ റഷീദിനെയാണ് മംഗളൂരു രാജ്യാന്തര വിമാനത്താവളത്തില്‍ കസ്റ്റംസ് അധികൃതര്‍ പിടികൂടിയത്. 9.57 ലക്ഷം രൂപ വില വരുന്ന 247.7 ഗ്രാം (30.96 പവന്‍) തൂക്കമുള്ള 2 സ്വര്‍ണ ബിസ്‌ക്കറ്റുകളാണ് ഇയാളില്‍ നിന്നു പിടികൂടിയത്.
ചൊവ്വ വൈകിട്ട് 5.50നു ദുബായില്‍ നിന്നുള്ള സ്പൈസ് ജെറ്റ് വിമാനത്തിലാണ് ഇയാള്‍ എത്തിയത്. തലമുടിക്കുള്ളില്‍ ഒളിപ്പിച്ച നിലയിലായിരുന്നു സ്വര്‍ണ ബിസ്‌ക്കറ്റുകള്‍. മെറ്റല്‍ ഡിറ്റക്ടറുപയോഗിച്ചുള്ള പരിശോധനയിലാണ് ഇതു കണ്ടെടുത്തത്.
