ചെന്നൈ: പൗരത്വ ഭേദഗതിനിയമവുമായി ബന്ധപ്പെട്ട് രാജ്യത്ത് അരങ്ങേറുന്ന അക്രമപ്രവര്ത്തനം ഒന്നിനും പരിഹാരമല്ലെന്ന് രജനീകാന്ത്. ഇതേത്തുടര്ന്ന് രജനീകാന്തിനെതിരെ മതമൗലികവാദികളും സൈബര് അക്രമികളും സോഷ്യല് മീഡിയയില് സംഘി വിളികളുമായി രംഗത്തുവന്നിരിക്കുകയാണ്.
ഇന്ത്യന് പൗരന്മാര് ഐക്യത്തോടെ നില്ക്കുകയും രാജ്യത്തിന്റെ സുരക്ഷയെയും ക്ഷേമത്തേയും കുറിച്ച് ബോധവാന്മാരാകുകയും വേണം. അക്രമത്തിനിടയാക്കിയതില് താന് അതീവ ദുഃഖിതനാണ് എന്നാണ് രജനി ട്വിറ്ററില് കുറിച്ചിരുന്നത്. മിനറ്റുകള്ക്കുള്ളില് അദ്ദേഹത്തെ വിമര്ശിച്ചും അനുകൂലിച്ചും ഹാഷ്ടാഗുകള് ഉയര്ന്നു.
അതേസമയം, അക്രമം അഴിച്ചുവിടുന്നവര്ക്കെതിരെയും പൊതുസ്വത്തുകള് നശിപ്പിക്കുന്നവര്ക്കുമെതിരെ കടുത്ത നടപടി സ്വീകരിക്കുമെന്ന് ഉത്തര്പ്രദേശ് സര്ക്കാര് വ്യക്തമാക്കി. പ്രതിഷേധത്തിന്റെ പേരില് കലാപം നടത്തരുന്നതെന്നും അക്രമികള്ക്കെതിരെ കര്ശന നടപടി സ്വീകരിക്കുമെന്ന് മുഖ്യമന്ത്രി യോഗി ആദിത്യനാഥ് പറഞ്ഞു.
പൗരത്വ ഭേദഗതി നിയമത്തിനെതിരെ തെരുവില് കലാപം നടത്തുന്നവര് ന്യൂസ് 18 നെറ്റ് വര്ക്കിന്റെ ഒബി വാന് കത്തിച്ചിരുന്നു. വാര്ത്ത റിപ്പോര്ട്ട് ചെയ്യാനെത്തിയ വാഹനം തടഞ്ഞുവെച്ചാണ് കലാപകാരികള് മാധ്യമസ്ഥാപനത്തിന്റെ വാഹനം തീയിട്ടത്. വാഹനത്തിലുള്ള മാധ്യമ പ്രവര്ത്തകര് കലാപകാരികളില് നിന്ന് രക്ഷപ്പെട്ടത് തലനാരിഴയ്ക്കാണ്. ഉത്തര് പ്രദേശിന്റെ പലയിടത്തും പൗരത്വ ഭേദഗതിക്കെതിരെ അക്രമികള് വ്യാപകമായി അക്രമം അഴിച്ചുവിടുകയാണ്.
