അലിഗഢ്: അലിഗഢ് സര്വകലാശാലയില് വിദ്യാര്ത്ഥികളെ മതം പറഞ്ഞ് വേര്തിരിക്കാന് ശ്രമിച്ചതിന് ഡോ. കഫീല് ഖാനെതിരേ പോലീസ് കേസെടുത്തു. മതവിദ്വേഷം വളര്ത്തുന്ന പ്രസംഗത്തിന്റെയടക്കമുള്ള വീഡിയോ ലഭിച്ചതിനെ തുടര്ന്നാണ് മപാലീസിന്റെ നടപടി. കഴിഞ്ഞദിവസം പൗരത്വ നിയമഭേദഗതിയുമായി ബന്ധപ്പെട്ട് അലിഗഢ് സര്വകലാശാലയില് നടന്ന പ്രതിഷേധങ്ങള്ക്കിടെയാണ് വിദ്യാര്ത്ഥികളെ മതം പറഞ്ഞ് വേര്തിരിപ്പിക്കുകയും അക്രമത്തിന് ആഹ്വാനം നല്കുകയും ചെയ്തത്.
കഫീല് ഖാന് നടത്തിയ പ്രസംഗം മതവിദ്വേഷം വളര്ത്തുന്നതാണെന്നാരോപിച്ച് പോലീസിനു പരാതി കിട്ടിയിരുന്നു. തുടര്ന്നാണ് കേസെടുത്തതെന്ന് അലിഗഢ് പോലീസ് സൂപ്രണ്ട് അഭിഷേക് പറഞ്ഞു. പൗരത്വനിയമം മുസ്ലിങ്ങളെ രണ്ടാംകിട പൗരന്മാരാക്കാന് ലക്ഷ്യമിട്ടുള്ളതാണെന്നും ജനങ്ങളെ ഹിന്ദുവും മുസ്ലിമുമായി വിഭജിക്കാനാണ് നിയമം ലക്ഷ്യമിടുന്നതെന്നും കഫീല്ഖാന്റെ പ്രസംഗത്തിലുണ്ടെന്ന് പോലീസ് നടത്തിയ പ്രാഥമികാന്വേഷണ റിപ്പോര്ട്ടില് പറയുന്നു. സമരത്തിനിടെ ഹിന്ദുത്വവിരുദ്ധ മുദ്രാവാക്യങ്ങള് വിളിച്ചതിന് മറ്റൊരാളുടെ പേരിലും പോലീസ് കേസെടുത്തിട്ടുണ്ട്. ഗൊരഖ്പുരിലെ ബി.ആര്.ഡി. ആശുപത്രിയില് 2017-ല് 60 കുട്ടികളുടെ മരണത്തിനിടയാക്കിയ സംഭവത്തില് നടപടി നേരിട്ടതിലൂടെയാണ് ഡോ. കഫീല് ഖാന് ആദ്യം പോലീസ് നടപടി നേരിടുന്നത്.
