വയനാട്: ബത്തേരിയില് സ്കൂളില് വെച്ച് വീണ്ടും വിദ്യാര്ത്ഥിക്ക് പാമ്പ് കടിയേറ്റു. ബീനാച്ചി ഗവ. എച്ച്എസ്എസിലെ രണ്ടാം ക്ലാസിലെ മുഹമ്മദ് റെയ്ഹാനെക്കാണ് സ്കൂള് മുറ്റത്ത് നിന്ന് പാമ്പു കടിയേറ്റത്. വിദ്യാര്ത്ഥിയെ മേപ്പാടിയിലെ സ്വകാര്യ ആശുപത്രിയില് പ്രവേശിപ്പിച്ചു.
ഇന്ന് ഉച്ചയോടെയായിരുന്നു സംഭവം. പരീക്ഷ കഴിഞ്ഞ് വീട്ടിലേക്ക് പോകാനിറങ്ങിയ വിദ്യാര്ത്ഥിക്ക് സ്കൂള് മുറ്റത്ത് നിന്നാണ് പാമ്പു കടിയേറ്റത്. എന്നാല്, കുട്ടി വീട്ടിലേക്ക് ഓടി പോവുകയും രക്ഷിതാക്കളെ വിവരം അറിയിക്കുകയും ചെയ്തു. തുടര്ന്ന് കുട്ടിയെ ആശുപത്രിയില് പ്രവേശിപ്പിച്ചത്. പരിശോധനയില് കാലില് പാമ്പ് കടിയേറ്റതിന് സമാനമായ മുറിവുകളുമുണ്ടായിരുന്നു.
വിവരമറിഞ്ഞ് സ്കൂള് അധികൃതരും ആശുപത്രിയില് എത്തി. സ്കൂള് മുറ്റത്ത് പാകിയ ടൈലിനുള്ളില് പാമ്പിനെ കണ്ടതായാണ് കുട്ടി രക്ഷിതാക്കളോട് പറഞ്ഞത്. വയനാട് ബത്തേരി സര്വജന വൊക്കേഷണല് ഹയര് സെക്കണ്ടറി സ്കൂളിലെ വിദ്യാര്ഥിനി ഷെഹ്ല ഷെറിന് പാമ്പുകടിയേറ്റ് മരിച്ച് ഒരു മാസം തികയുന്നതിന് മുന്പാണ് ജില്ലയില് വീണ്ടും വിദ്യാര്ഥിക്ക് പാമ്പു കടിയേറ്റെന്ന വാര്ത്ത പുറത്തുവരുന്നത്.
