കൊച്ചി: വിരോധവും വിയോജിപ്പും പരസ്പരം മറന്ന് പൗരത്വ ബില്ലിനെതിരെ എല്‍ഡിഎഫും യുഡിഎഫും 16ന് തിരുവനന്തപുരത്ത് ധര്‍ണ നടത്തുന്നത് രാഷ്ട്ര വിഭജനത്തിന് കളമൊരുക്കാനാണെന്ന് ബിജെപി ദേശീയ നിര്‍വാഹക സമിതി അംഗം പി.കെ. കൃഷ്ണദാസ്.
കേരളത്തിന്റെ വികസന പ്രവര്‍ത്തനങ്ങളുടെ പേരിലല്ല, രാജ്യവിരുദ്ധ താത്പര്യം സംരക്ഷിക്കാനാണ് ഈ ധര്‍ണ. രാജ്യദ്രോഹ പ്രവര്‍ത്തനങ്ങളുടെ പേരില്‍ ജയിലില്‍ കഴിയുന്ന മദനിക്ക് വേണ്ടിയും നോട്ട് നിരോധന സമയത്തും രാമജന്മ ഭൂമി പ്രശ്‌നത്തിലും കോണ്‍ഗ്രസും കമ്മ്യുണിസ്റ്റും മുസ്ലിം ലീഗും ഒരുമിച്ച് നിയമസഭയില്‍ പ്രമേയം പാസാക്കിയ ചരിത്രവും ഉണ്ട്. ഈ അവിശുദ്ധ സഖ്യം രാഷ്ട്ര വിഭജനത്തിലേക്ക് ചെന്നെത്തിക്കുമോയെന്ന് ബിജെപി ആശങ്കപ്പെടുകയാണ്. ഇല്ലാത്ത പ്രശ്‌നത്തിന്റെ പേരില്‍ കേരളത്തില്‍ മത കലാപം സൃഷ്ടിക്കുന്നതിനാണ് മുഖ്യമന്ത്രി പിണറായി വിജയനും, പ്രതിപക്ഷ നേതാവ് രമേശ് ചെന്നിത്തലയും തയാറാവുന്നതെന്ന് കൃഷ്ണദാസ് പത്രസമ്മേളനത്തില്‍ പറഞ്ഞു.
പൗരത്വ ബില്ലിന്റെ പേരില്‍ മുസ്ലിം സമൂഹത്തിനിടയില്‍ ഭീതിപരത്തുകയാണ് ഇക്കൂട്ടര്‍ ചെയ്യുന്നത്. അവിശുദ്ധ സംഖ്യം ധര്‍ണ നടത്തേണ്ടത് പാലാരിവട്ടം മേല്‍പ്പാലത്തിന് താഴെ ആയിരുന്നു വേണ്ടതെന്നും അദ്ദേഹം പറഞ്ഞു. ജില്ലാ പ്രസിഡന്റ് വി.എന്‍. വിജയന്‍, ജനറല്‍ സെക്രട്ടറിമാരായ എം.എന്‍. മധു, കെ.എസ്. ഷൈജു എന്നിവരും പങ്കെടുത്തു.
