തിരുവനന്തപുരം : മാധ്യമങ്ങളും സര്‍ക്കാരുമെല്ലാം പരിഹസിച്ച് തടഞ്ഞാലും അതില്‍ തളരാതെ ജനസേവനം നടത്തുന്ന അച്ഛനെ കുറിച്ചോര്‍ത്ത് അഭിമാനം തോന്നുന്നതായി സുരേഷ് ഗോപിയുടെ മകനും നടനുമായ ഗോകുല്‍ സുരേഷ്. എംപി വികസന ഫണ്ട് ഉപയോഗിച്ച് തമ്പാനൂര്‍ റെയില്‍വേ സ്റ്റേഷനില്‍ പ്ലാസ്റ്റിക് റീസൈക്കിള്‍ മെഷീന്‍ സ്ഥാപിച്ചതിന്റെ പശ്ചാത്തലത്തിലാണ് ഗോകുല്‍ സുരേഷ് ട്വിറ്ററിലൂടെ ഇക്കാര്യം അറിയിച്ചത്.
മാധ്യമങ്ങളും നിയമനിര്‍മാതാക്കളും സര്‍ക്കാരുമെല്ലാം അച്ഛന്റെ യോഗ്യതകളെ എത്രത്തോളം തടഞ്ഞുവച്ചാലും, പൊതുജനങ്ങളുടെ ക്ഷേമത്തിനും മികവിനും വേണ്ടിയുള്ള നടപടികളുമായി എപ്പോഴും മുന്നോട്ട് പോവുന്ന നിങ്ങള്‍ അഭിമാനമാണ് അച്ഛായെന്നുമായിരുന്നു ഗോകുലിന്റെ ട്വീറ്റ്.
എംപി വികസന ഫണ്ടില്‍ നിന്നും അഞ്ചുലക്ഷം രൂപ ചെലവഴിച്ചാണ് പ്ലാസ്റ്റിക് റീ സൈക്കിള്‍ മെഷീന്‍ സ്ഥാപിച്ചത്. കഴിഞ്ഞ ദിവസം
ഒ. രാജഗോപാല്‍ എംഎല്‍എയാണ് മെഷീനിന്റെ ഉദ്ഘാടനം നിര്‍വ്വഹിച്ചത്. പ്ലാസ്റ്റിക് കുപ്പികള്‍ ഈ മെഷീനില്‍ നിക്ഷേപിച്ചാല്‍ അവ ചെറിയ തരികളായി പൊടിക്കും. ഒരു മണിക്കൂറില്‍ 400 മുതല്‍ 500 വരെ കുപ്പികള്‍ നിക്ഷേിച്ച്‌പൊടിക്കാന്‍ ഈ മെഷീനു സാധിക്കും. ഇങ്ങനെ പൊടിച്ചു കിട്ടുന്ന തരികള്‍ പൂനൈയിലെ സംസ്‌കാരണപ്ലാന്റുകള്‍ക്ക് കൈമാറുകയും അവ സംസ്‌കരിച്ച് പ്ലാസ്റ്റിക് ടോയ്ലറ്റ്, ബിന്നുകള്‍ എന്നിവയുടെ നിര്‍മാണത്തിന് പുനരുപയോഗിക്കുകയും ചെയ്യും. റോഡ് ടാറിങ്ങിനും ഈ അസംസ്‌കൃത വസ്തു ഉപയോഗിക്കാനാവും. പ്ലാസ്റ്റിക് ഉപയോഗം കുറക്കുക, പരിസ്ഥിതി സംരക്ഷിക്കുക എന്നീ നയങ്ങളുടെ ഭാഗമായാണ് ഈ മെഷീന്‍ സ്ഥാപിച്ചത്.
