ശബരിമല: പമ്പയില് ആരംഭിച്ച അപ്പം-അരവണ കൗണ്ടര് ബോര്ഡിന് ബാധ്യതയാകുന്നു. കഴിഞ്ഞ 10നാണ് തീര്ത്ഥാടകരുടെ സൗകര്യാര്ത്ഥമെന്ന രീതിയില് കൗണ്ടര് ആരംഭിച്ചത്.
എന്നാല് പ്രതീക്ഷിച്ച രീതിയില് അപ്പം-അരവണ വിറ്റുപോകാത്തതും ഇവ പമ്പയിലേക്ക് എത്തിക്കാനുള്ള അധിക ചെലവുമാണ് ബോര്ഡിന്റെ ആശങ്കയ്ക്ക് കാരണം. പ്രതിദിനം പതിനായിരം എണ്ണം വീതം അപ്പം-അരവണ വിറ്റുപോകുമെന്നായിരുന്നു കണക്കുകൂട്ടല്. എന്നാല് കൗണ്ടര് തുടങ്ങി മൂന്ന് ദിവസം പിന്നിടുമ്പോള് വെറും 7000 ടിന് അരവണയും 2600കവര് അപ്പവും മാത്രമാണ് വിറ്റത്. സന്നിധാനത്തെ അത്ര തോതില് പമ്പയില് ഇവ സ്റ്റോക്ക് ചെയ്യാന് കഴിയില്ല. അതിനാല് ഇടയ്ക്കിടയ്ക്ക് സന്നിധാനത്ത് നിന്ന് അപ്പവും അരവണയും ട്രാക്ടറുകളില് ശരണപാതയിലൂടെ പമ്പയില് എത്തിക്കണം. ഇത് തീര്ത്ഥാടകരുടെ സഞ്ചാരത്തെ ബാധിക്കുന്നുണ്ട്. ശര്ക്കര കൊണ്ടുവരുന്ന ട്രാക്ടറിലാണ് അപ്പവും അരവണയും പമ്പയില് എത്തിക്കുന്നത്. ഇങ്ങനെ അധിക സര്വീസ് നടത്തുന്നതിന് ട്രാക്ടര് വാടക നല്കേണ്ടത് ബോര്ഡിന് ബാധ്യതയാകുന്നുണ്ട്.
നിലവില് ദേവസ്വം ബോര്ഡിന്റെ 12 ജീവനക്കാരും ധനലക്ഷ്മി ബാങ്കിന്റെ 27 ജീവനക്കാരുമാണുള്ളത്. ഇപ്പോള് രണ്ട് ക്യാഷ് കൗണ്ടറും ഒരു പിഒഎസ് കൗണ്ടറുമാണുള്ളത്. വരും ദിവസങ്ങളില് ഓണ്ലൈന് കൗണ്ടറും പ്രീപെയ്ഡ് കൗണ്ടറും ആരംഭിക്കുമെന്നാണ് ബോര്ഡ് പറയുന്നത്. പമ്പയില് അപ്പം-അരവണ കൗണ്ടര് തുടങ്ങിയതിനെതിരെ വിവിധ ഹൈന്ദവ സംഘടനകളും പന്തളം കൊട്ടാരവും എതിര്പ്പ് പ്രകടിപ്പിച്ചിരുന്നു.
