കണ്ണൂര്‍: സംസ്ഥാനസര്‍ക്കാര്‍ ജീവനക്കാരോട് ഇടത് സര്‍ക്കാര്‍ നീതി പുലര്‍ത്തിയില്ലെന്ന് രാഷ്‌ട്രീയ രാജ്യകര്‍മ്മചാരി മഹാസംഘ് അഖിലേന്ത്യ ജനറല്‍ സെക്രട്ടറി വിഷ്ണുപ്രസാദ് വര്‍മ പറഞ്ഞു. ദത്തോപാന്ത് ഠേംഗ്ഡിജി നഗറില്‍ (നവനീതം ഓഡിറ്റോറിയം) എന്‍ജിഒ സംഘ് സംസ്ഥാന സമ്മേളനത്തിന്റെ ഭാഗമായി നടന്ന പ്രതിനിധി സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
തെരഞ്ഞെടുപ്പ് വേളയില്‍ ജീവനക്കാര്‍ക്ക് നല്‍കിയ വാഗ്ദാനങ്ങള്‍ നടപ്പാക്കാതെ പരാജയമായി സര്‍ക്കാര്‍ മാറി. പങ്കാളിത്ത പെന്‍ഷന്‍ പുനഃപരിശോധിക്കുന്നതിലും ജീവനക്കാര്‍ക്കുളള ആരോഗ്യ ഇന്‍ഷുറന്‍സ് പദ്ധതി നടപ്പാക്കുന്നതിലും അലംഭാവമാണ് സര്‍ക്കാരിന്റേതെന്നും അദ്ദേഹം കുറ്റപ്പെടുത്തി. സംസ്ഥാന പ്രസിഡന്റ് സി.സുരേഷ്‌കുമാര്‍ അധ്യക്ഷത വഹിച്ചു.
ബിഎംഎസ് സംസ്ഥാന വൈസ് പ്രസിഡന്റ് സി. ഉണ്ണികൃഷ്ണന്‍ ഉണ്ണിത്താന്‍ മുഖ്യപ്രഭാഷണം നടത്തി. ബിഎംഎസ് സംസ്ഥാന ജനറല്‍ സെക്രട്ടറി എം.പി. രാജീവന്‍, റിട്ട. ജസ്റ്റിസ് കെ.പി. ജ്യോതീന്ദ്രനാഥ്, എന്‍ടിയു സംസ്ഥാന പ്രസിഡന്റ്് സി. സദാനന്ദന്‍ മാസ്റ്റര്‍, ബിജെപി ജില്ലാ പ്രസിഡന്റ് പി. സത്യപ്രകാശ് ബിഎംഎസ് കണ്ണൂര്‍ ജില്ലാ സെക്രട്ടറി സി.വി. തമ്പാന്‍ എന്നിവര്‍ സംസാരിച്ചു.
എന്‍ജിഒ സംഘ് സംസ്ഥാന ജനറല്‍ സെക്രട്ടറി എസ്.കെ. ജയകുമാര്‍ സ്വാഗതവും സ്വാഗത സംഘം ജനറല്‍ കണ്‍വീനര്‍ എം.ടി. മധുസൂദനന്‍ നന്ദിയും പറഞ്ഞു. സമ്മേളനത്തിന്റെ രണ്ടാം ദിവസമായ ഇന്നലെ യാത്രയയപ്പ് സമ്മേളനം, സാംസ്‌ക്കാരിക സമ്മേളനം, വനിതാസമ്മേളനം എന്നിവയും നടന്നു. യാത്രയയപ്പ് സമ്മേളനത്തോടൊപ്പം ആദരിക്കല്‍ ചടങ്ങും നടന്നു. വൈകുന്നേരം കണ്ണൂര്‍ നഗരത്തില്‍ റാലിയും തുടര്‍ന്ന് സ്‌റ്റേഡിയം കോര്‍ണറില്‍ പൊതുസമ്മേളനവും നടന്നു.
സമ്മേളനം ഇന്ന് സമാപിക്കും. ഠേംഗ്ഡ്ജി ജന്മശതാബ്ദി ആഘോഷത്തിന്റെ ഭാഗമായി രാവിലെ 8.30ന് ചേംബര്‍ ഹാളില്‍ ബിഎംഎസ് സംസ്ഥാന ഉപാധ്യക്ഷന്‍ ഉണ്ണികൃഷ്ണന്‍ ഉണ്ണിത്താന്‍ ഠേംഗ്ഡ്ജി അനുസ്മരണ പ്രഭാഷണം നടത്തും.
തുടര്‍ന്ന് സൗഹൃദ സമ്മേളനവും സംസ്ഥാന കൗണ്‍സില്‍ യോഗവും നടക്കും.
