തിരുവനന്തപുരം: നാട്ടുവൈദ്യവും നാട്ടറിവുകളും സംരക്ഷിച്ച് വരും തലമുറക്ക് കൈമാറേണ്ടത് ഓരോ ഭാരതീയന്റേയും ധർമ്മം ആണെന്ന് സ്വാമി അദൃശ്യ കാട് സിദ്ധേശ്വര പ്രസ്താവിച്ചു. വൈദ്യമഹാസഭ മഹാസമ്മേളനത്തോടനുബന്ധിച്ച് നടത്തിയ നാട്ടുവൈദ്യത്തിന്റെ ശാസ്ത്രീയത ദേശീയ സെമിനാർ ഉദ്ഘാടനം ചെയ്യുകയായിരുന്നു അദ്ദേഹം. മഹാരാഷ്ട്രയിലെ കോലാപ്പൂർ കനേരി ശ്രീക്ഷേത്ര സിദ്ധഗിരി മഠം മഠാധിപതിയാണ് സ്വാമി അദൃശ്യകാട് സിദ്ധേശ്വര.
സംഘടിച്ചു ശക്തരായാൽ മാത്രമേ അവകാശങ്ങൾ നേടിയെടുക്കാനാകൂ. അലോപ്പതിക്കാരുടെ ആക്രമണമുണ്ടായപ്പോൾ ആയുർവ്വേദക്കാർ സംഘടിച്ചു. ഹോമിയോക്കാരും അതുതന്നെ ചെയ്തു. ആയുഷ് സിസ്റ്റത്തിലൂടെ സർക്കാർ അവർക്ക് അംഗീകാരം നൽകി. നൂറ്റാണ്ടുകളായി തലമുറകൾ കൈമാറിയ നാട്ടുവൈദ്യം ഇന്നും ഫലപ്രാപ്തി തെളിയിച്ചു കൊണ്ടിരിക്കുന്നു. ഗ്രാമങ്ങളിൽ ഒതുങ്ങി കഴിയുന്ന വൈദ്യന്മാർ ഉണ്ടാക്കുന്ന നാട്ടുവൈദ്യ മരുന്നുകൾ അന്താരാഷ്ട്ര നിലവാരം പുലർത്തുന്നു. മറ്റ് ചികിത്സാ സംവിധാനങ്ങൾ കൈയൊഴിയുന്നവരെപ്പോലും രക്ഷപ്പെടുത്തുവാൻ നാട്ടുവൈദ്യത്തിനു കഴിയുന്നു. ഈ വിവരം ലോകത്തെ അറിയിയ്ക്കാനുള്ള ചുമതലകൾ വൈദ്യ മഹാസഭ ഏറ്റെടുക്കണം, അദ്ദേഹം പറഞ്ഞു.
മുൻ മിസോറാം ഗവർണർ കുമ്മനംരാജശേഖരൻ മുഖ്യാതിഥിയായിരുന്നു. പൗരാണിക പൈതൃക സമ്പത്തുകളിൽ ഉൾപ്പെട്ട നാട്ടറിവുകളും നാട്ടുവൈദ്യവും സംരക്ഷിക്കപ്പെടേണ്ടത് ഭരണാധികാരികളുടെ ചുമതലയാണ്., അദ്ദേഹം പറഞ്ഞു.
മാന്നാർ ജി. രാധാകൃഷ്ണൻവൈദ്യർ അദ്ധ്യക്ഷതവഹിച്ചു. അഡ്വ. ചാണ്ടിഉമ്മൻ ആശംസാപ്രസംഗം നടത്തി. ഡോ. എൻ. ഗോപാലകൃഷ്ണൻ, കരിങ്ങന്നൂർ പ്രഭാകരൻ വൈദ്യർ, തലക്കുളം വേലപ്പൻ ആശാൻ, ഡോ. രവി.എം.നായർ, കെ.എൻ. വാസുദേവൻ വൈദ്യർ, കോട്ടയം രാമകൃഷ്ണൻ ഗുരുക്കൾ, തീർത്ഥ ഗാട്ടിയ വൈദ്യ (ഒറീസ), ബിജു കാരക്കോണം, ചരിത്രമാളിക ടി.എസ്. അഭിലാഷ്കുമാർ, മലപ്പുറം സിദ്ദിഖ് വൈദ്യർ, കാഞ്ഞങ്ങാട് എസ്. മോഹൻ, യോഗാചാര്യ ശ്രീകണ്ഠൻ നായർ, സിസ്റ്റർ എലിസബത്ത് കുപ്പോഴയ്ക്കൽ എന്നിവർക്ക് ശ്രേഷ്ഠസേവാ, വൈദ്യ പ്രതിഭ പുരസ്കാരങ്ങൾ നൽകി ആദരിച്ചു. പാരമ്പര്യ വൈദ്യവും അറിവുകളും സമൂഹത്തിൽ എത്തിക്കുന്നതിൽ മികച്ച സേവനം നടത്തുന്ന മഹാത്മാദേശ സേവാ ട്രസ്റ്റ് – വടകര, ശാന്തിഗ്രാം – ചപ്പാത്ത്, മിത്രനികേതൻ – വെള്ളനാട്, ആയുഷ്യ – ചങ്ങനാശ്ശേരി എന്നീ സംഘടനകൾക്ക് വിശിഷ്ടസേവാ പുരസ്കാരങ്ങൾ സ്വാമി അദൃശ്യകാട് സിദ്ധേശ്വര വിതരണം ചെയ്തു.
തുടർന്നു നടന്ന സെമിനാറിൽ ഡോ. എൻ. ഗോപാലകൃഷ്ണൻ, ഡോ. തോമസ് മാത്യു, പ്രൊഫ. എ. വിജയൻ, കളരിക്കൽ കെ.എൻ. വാസുദേവൻ വൈദ്യർ എന്നിവർ നാട്ടുവൈദ്യത്തിന്റെ ശാസ്ത്രീയത എന്ന വിഷയം അവതരിപ്പിച്ചു
