കല്ലമ്പലം : നാവായിക്കുളം കുടവൂര് പത്തനാപുരം ശ്രീകൃഷ്ണസ്വാമി ക്ഷേത്രത്തിലെ ചുറ്റുമതിലിനുള്ളില് നിന്നിരുന്ന ചന്ദനമരം മോഷ്ടാക്കള് മുറിച്ചു കടത്തി. 80 വര്ഷം പഴക്കവും 18 അടിയോളം പൊക്കവുമുള്ള ചന്ദനമരമാണ് മുറിച്ചു കടത്തിയതെന്ന് അധികൃതര് പറഞ്ഞു.
ചുറ്റുമതിലിനു സമീപമുള്ള യക്ഷിത്തറയോട് ചേര്ന്ന് നിന്ന ചന്ദനമരമാണ് മെഷീന്വാളുപയോഗിച്ച് മുറിച്ചു കടത്തിയത്. യക്ഷിത്തറയ്ക്ക് സമീപം സ്ഥാപിച്ചിട്ടുള്ള എല്ഇഡി ലൈറ്റ് ഓഫാക്കിയാണ് മുറിച്ചത്. ഇതിന്റെ സ്വിച്ച് ആര്ക്കും എളുപ്പം മനസ്സിലാകാത്ത സ്ഥലത്താണ് സ്ഥാപിച്ചിട്ടുള്ളത്. അതിനാല് ക്ഷേത്രത്തിനെക്കുറിച്ച് വ്യക്തമായി അറിയാവുന്നവരാകാം ഇതിന്റെ പിന്നിലെന്ന് ഭാരവാഹികള് സംശയിക്കുന്നു. ക്ഷേത്രപരിസരത്ത് ഇന്നലെ രാത്രി 11.30വരെ ആളുണ്ടായിരുന്നതിനാല് അതിനു ശേഷമാണ് മരം മുറിച്ചത്.
