കോട്ടയം: ശബരിമലയിലെ അപ്പവും അരവണ പ്രസാദവും ക്ഷേത്ര സങ്കേതത്തിന് വെളിയില് വില്പ്പനയ്ക്ക് വയ്ക്കുന്നതിലൂടെ ദേവസ്വം ബോര്ഡ് കച്ചവടവത്ക്കരിക്കുകയാണെന്ന് ഹിന്ദു ഐക്യവേദി സംസ്ഥാന ജനറല് സെക്രട്ടറി ഇ.എസ്. ബിജു.
ക്ഷേത്രത്തിന്റെ തിടപ്പള്ളിയില് തയാറാക്കി ദേവന് നിവേദിച്ചാണ് പ്രസാദം ഭക്തര്ക്ക് വിതരണം ചെയ്യുന്നത്. ഇത് പമ്പ ക്ഷേത്രത്തില് വച്ച് വില്പ്പന നടത്തുന്നത് ഗുരുതരമായ ആചാരലംഘനമാണ്. ശബരിമല വിശ്വാസത്തെയും, ആചാരത്തെയും, വഴിപാട് പ്രസാദത്തെയും പൂങ്കാവനത്തിന്റെ പ്രകൃതിരമണീയതയെയും സര്ക്കാരും ദേവസ്വം ബോര്ഡും വില്പ്പനയ്ക്ക് വയ്ക്കുന്നത് അംഗീകരിക്കാനാകില്ല.
ശബരിമലയെ ടൂറിസ്റ്റ് കേന്ദ്രവും, വ്യവസായ പാര്ക്കും ആക്കാനാണ് ശ്രമിക്കുന്നത്. കാണിക്കവഞ്ചി നവീകരിക്കാനും, യന്ത്രപക്ഷിയെ സന്നിധാനത്ത് എത്തിക്കാനും, എയര് വാഗണ് യാത്രയും കച്ചവടവത്ക്കരണത്തിന്റെ ഭാഗമാണ്. അതേസമയം തീര്ത്ഥാടകര്ക്ക് പ്രാഥമികാവശ്യങ്ങള്ക്ക് സൗകര്യം ഏര്പ്പെടുത്താനും പമ്പയില് പിതൃതര്പ്പണം നടത്തുന്നതിനും, മാലിന്യനിര്മ്മാര്ജ്ജനത്തിനും ശൗചാലയങ്ങള് പ്രവര്ത്തന സജ്ജമാക്കാനും നടപടി സ്വീകരിക്കുന്നില്ല.
ഇടത്താവളങ്ങള്, നിലക്കല്, പമ്പ, ത്രിവേണി, സന്നിധാനം എന്നിവിടങ്ങളില് മുന്കാലങ്ങളില് ഉറപ്പ് വരുത്തിയിട്ടുള്ള സംവിധാനങ്ങള് പോലും തീര്ത്ഥാടനം ആരംഭിച്ച് 25 ദിവസം കഴിഞ്ഞിട്ടും പൂര്ത്തിയായിട്ടില്ലെന്ന് അദ്ദേഹം പറഞ്ഞു.
ആചാരവിരുദ്ധ തീരുമാനങ്ങളില് നിന്ന് ദേവസ്വം ബോര്ഡ് പിന്മാറണമെന്നും അല്ലെങ്കില് പ്രക്ഷോഭങ്ങള്ക്ക് നേതൃത്വം നല്കുമെന്നും ബിജു പറഞ്ഞു.
