കൊച്ചി: കേരള ചേംബര് ഓഫ് കൊമേഴ്സ് ആന്ഡ് ഇന്ഡസ്ട്രിയുടെ കൊച്ചിയിലെ ആസ്ഥാനം റവന്യു വകുപ്പ് ജപ്തി ചെയ്തു. 38 കോടി രൂപയുടെ നികുതി കുടിശ്ശിക വരുത്തിയതിനെത്തുടര്ന്നാണ് നടപടി. ഇന്നലെ ഉച്ചയ്ക്ക് മൂന്നു മണിയോടെയാണ് റവന്യു റിക്കവറി തഹസില്ദാര് റാണി പി. എല്ദോയുടെ നേതൃത്വത്തില് ഉദ്യോഗസ്ഥര് ജപ്തി നടപടികള് ആരംഭിച്ചത്.
മറൈന്ഡ്രൈവില് ചെറുപുഷ്പം ഫിലിംസ് പ്രൈവറ്റ് ലിമിറ്റഡുമായി ചേര്ന്ന് 2003ല് ചേംബര് നിര്മിച്ച കേരള ട്രേഡ് സെന്റര് എന്ന ബഹുനില മന്ദിരവുമായി ബന്ധപ്പെട്ടാണ് നടപടി. കെട്ടിടത്തിലെ ഫ്ളാറ്റുകളും നിലകളും വിറ്റയിനത്തിലാണ് നികുതി കുടിശ്ശിക വരുത്തിയത്. കെ.എന്. മര്സൂഖ് ചെയര്മാനായുള്ള കഴിഞ്ഞ ഭരണസമിതിയുടെ കാലത്ത് ഈ കെട്ടിടത്തിലെ രണ്ടു നിലയും എട്ട് ഫ്ളാറ്റുകളും വിറ്റിരുന്നു. കെട്ടിടനിര്മാണ ചട്ടം ലംഘിച്ചെന്ന് ചൂണ്ടിക്കാട്ടി കൊച്ചി നഗരസഭ കെട്ടിടത്തിനു നമ്പര് നല്കാത്തതിനാല് ഫ്ളാറ്റുകള് വാങ്ങിയവര്ക്ക് ഇവ കൈമാറാനായില്ല. ഇടപാടുമായി ബന്ധപ്പെട്ട് 57 ലക്ഷം രൂപ നികുതി നല്കേണ്ടിയിരുന്നു. ഇത് അടയ്ക്കുന്നതില് വീഴ്ച വരുത്തി. ഇതിന്റെ പലിശയും പിഴ പലിശയും ഉള്പ്പെടെ 38 കോടി രൂപ നല്കിയില്ലെങ്കില് ജപ്തി നടപടി സ്വീകരിക്കുമെന്ന് മൂന്നു മാസം മുന്പ് തന്നെ നോട്ടീസ് അയച്ചിരുന്നു. തുക അടയ്ക്കാത്തിനെ തുടര്ന്നാണ് ഓഫീസ് ജപ്തി ചെയ്തത്.
അതേസമയം, തുക കണക്കാക്കിയതില് പിഴവുണ്ടെന്ന് ചേംബര് ഓഫ് കൊമേഴ്സ് പ്രസിഡന്റ് ബിജു രമേശ് പറഞ്ഞു. ഇതിനെതിരെ റവന്യു മന്ത്രിക്കു പരാതി നല്കിയിരുന്നു. ഓഫീസ് കെട്ടിടമായതിനാല് ചേംബറിലെ ചുമതലപ്പെട്ട ഒരു ഉദ്യോഗസ്ഥന് മേല്നോട്ട ചുമതല കൈമാറുമെന്ന് തഹസില്ദാര് അറിയിച്ചു. പിന്നീട് കെട്ടിടം ലേലം ചെയ്യുന്നുവെന്ന് കാട്ടി നോട്ടീസ് നല്കിയശേഷം തുടര് നടപടി സ്വീകരിക്കും.
