കൊച്ചി: ഒരു നിമിഷമെങ്കില് ഒരു നിമിഷം!! പുകയരുത്… ജ്വലിക്കണം!! ഈ വാക്കുകള് ഒരുപക്ഷേ എല്ലാവര്ക്കും പരിചിതമായിരിക്കും. തന്നെ കാര്ന്നു തിന്നുന്ന മഹാരോഗത്തെ കാമുകിയെന്ന് വിശേഷിപ്പിച്ച് ജീവിതത്തിലെ ഓരോ പ്രതിസന്ധിഘട്ടങ്ങളെയും നിറപുഞ്ചിരിയോടെ നേരിടുന്ന തിരുവനന്തപുരം സ്വദേശി നന്ദു മഹാദേവയെ അറിയാത്തവരായി അധികമാരുമുണ്ടാകില്ല.
നന്ദുവിന്റെ ഫേസ്ബുക്ക് ബയോ ആണ് മുകളില് കണ്ടത്. ക്യാന്സറെന്ന രോഗം തന്നില് ഇടം പിടിച്ചതു മുതല് അതിനെ കാമുകിയായി ഫേസ്ബുക്കിലൂടെ അവന് ലോകത്തിന് മുന്നില് അവതരിപ്പിച്ചു. താന് വീണ്ടും ചികിത്സയ്ക്കായി കോഴിക്കോട് എംവിആര് ആശുപത്രിയില് പ്രവേശിക്കുന്നതും കീമോ തുടങ്ങുന്നതും അറിയിച്ചതും ഫേസ്ബുക്കിലൂടെ.
ഏറെ നൊമ്പരപ്പെടുത്തുന്ന വാക്കുകളിലൂടെയാണ് തന്റെ ധമനികളെ രോഗം ബാധിച്ചത് പറയുന്നത്. എന്റെ ട്രീറ്റ്മെന്റിന്റെ കാര്യങ്ങളും അനുഭവിക്കുന്ന വേദനകളുടെ തീഷ്ണതയും ഞാന് എന്റെ ചങ്കുകളോട് വിളിച്ചു പറയുന്നതിന് ഒരു വലിയ ഉദ്ദേശ്യമുണ്ട്… നമ്മുടെ കൈയിലുള്ള ഏറ്റവും വലിയ സമ്പത്ത് നമ്മുടെ ജീവനും ജീവിതവും ആണെന്ന് അനുഭവങ്ങളിലൂടെ ഞാന് പഠിച്ച സത്യം മനസ്സിലാക്കി തരുന്നതിന് വേണ്ടിയാണ്. ആഡംബര ബൈക്ക് വാങ്ങിക്കൊടുക്കാത്തതിനും, പരീക്ഷയ്ക്ക് മാര്ക്ക് കുറയുന്നതിനും, കൂട്ടുകാരന് കളിയാക്കിയതിനും, പ്രണയം തകര്ന്നതിനും ഒന്നും ഇനിയൊരു വ്യക്തി പോലും സ്വന്തം ജീവിതം ത്യജിക്കാതിരിക്കാന് വേണ്ടിയാണ്. എന്തൊക്കെ നഷ്ടപ്പെട്ടാലും കൈയിലുള്ള ജീവിതമാണ് ഏറ്റവും വലിയ ധനമെന്ന് തിരിച്ചറിവ് കുഞ്ഞുങ്ങള്ക്ക് ഉണ്ടാകാന് വേണ്ടിയാണ്… ഇങ്ങനെ തുടരുന്നു.
അവന്റെ ഓരോ വാക്കുകളും അടുത്ത തലമുറകള്ക്കുള്ള സന്ദേശമാണ്. സത്യത്തില് ബുദ്ധന് ധ്യാനത്തിലൂടെ കിട്ടിയത് പോലെയൊരു അറിവും ബോധവും ആണ് തനിക്ക് അര്ബുദത്തിലൂടെ കിട്ടിയതെന്ന അവന്റെ വാക്കുകള് നമ്മളെ പിടിച്ചിരുത്തുന്നതാണ്.
ക്യാന്സര് ഇല്ലാതിരുന്ന നന്ദുവിനെക്കാള് എത്രയോ മടങ്ങ് അധികം സന്തോഷവാനും ഉന്മേഷവാനും ആണ് ഇന്ന് താനെന്ന് പറയുകയാണ് നന്ദു. എന്തിനും ഏതിനും വിധിയെപ്പഴിക്കുന്ന സമൂഹത്തില് നിന്ന് വ്യത്യസ്തമായി നന്ദു വിധിക്ക് നന്ദി പറയുകയാണ്. ആദ്യം കാലിലായിരുന്നു ക്യാന്സര് ബാധിച്ചത്. തുടര്ന്ന് കാല് മുറിച്ചുമാറ്റി. പിന്നീട് ശ്വാസകോശത്തിലേക്കായി. കീമോയെടുത്തു. ഇപ്പോള് ഹൃദയത്തിലേക്കുള്ള രക്തക്കുഴലുകളിലാണ്.
ഫേസ്ബുക്ക് കുറിപ്പിനു താഴെ പ്രാര്ഥനയുടെ പ്രവാഹം. സുഖമായി എത്രയും വേഗം തിരിച്ചെത്താനുള്ള ആശംസകള്. ഞാനിതാ തിരിച്ചെത്തിയിരിക്കുന്നു എന്ന നന്ദുവിന്റെ വാക്കുകള്ക്കായി കാത്തിരിക്കുന്നു എല്ലാവരും.
