മുംബൈ: പരമ്പര പിടിക്കാന് ഇന്ത്യ ഇന്നിറങ്ങുന്നു. ഇന്ത്യ-വിന്ഡീസ് ടി 20 പരമ്പരയിലെ ‘ഫൈനല്’ ഇന്ന് മുംബൈ വാംഖഡെ സ്റ്റേഡിയത്തില് നടക്കും. ആദ്യ രണ്ട് മത്സരങ്ങളും ഇരുടീമും വിജയിച്ച് സമനില പാലിച്ചതോടെയാണ് ഇന്നത്തെ മത്സരം ഫൈനലായത്. ജയിക്കുന്ന ടീമിന് പരമ്പര സ്വന്തമാകും. രാത്രി ഏഴിന് കളിതുടങ്ങും.
ആദ്യ മത്സരത്തില് ആധികാരിക വിജയം നേടിയ ഇന്ത്യ രണ്ടാം മത്സരം പിഴവുകള് വരുത്തി കൈവിടുകയായിരുന്നു. ലോകത്തിലെ ഏറ്റവും മികച്ച ഫീല്ഡിങ് ടീമെന്ന് വിശേഷിപ്പിച്ചിരുന്ന ഇന്ത്യ കഴിഞ്ഞ മത്സരത്തില് ഓട്ടകയ്യോടെയായിരുന്നു കളത്തിലിറങ്ങിയത്. അനായാസ ക്യാച്ചുകള് പോലും ഇന്ത്യല് താരങ്ങള് കൈവിട്ടു. ബാറ്റിങ്ങും ബൗളിങ്ങും സുരക്ഷിതമല്ല. ആദ്യ മത്സരത്തില് തിളങ്ങിയെങ്കിലും രണ്ടാം മത്സരത്തില് ഓപ്പണര് കെ.എല്. രാഹുല് തീര്ത്തും പരാജയമായിരുന്നു. ഹിറ്റ്മാന് രോഹിത് ശര്മയാകട്ടെ രണ്ട് മത്സരങ്ങളിലും പരാജയപ്പെട്ടു. പരമ്പരയില് ഒരു മത്സരത്തിലെങ്കിലും തകര്ത്തടിക്കുന്ന ശീലം രോഹിത് തുടര്ന്നാല് മുംബൈയില് ഇന്ത്യക്ക് കാര്യങ്ങള് എളുപ്പമായേക്കും. മധ്യനിരയില് ഇന്ത്യന് നായകന് വിരാട് കോഹ്ലിക്ക് പിന്തുണ നല്കാന് ഋഷഭ് പന്തിനും ശിവം ദുബെയ്ക്കും ശ്രേയസ് അയ്യര്ക്കും എത്രത്തോളം സാധിക്കുമെന്ന് കണ്ടറിയണം.
ഇന്ത്യയുടെ ബൗളിങ്ങിലും ചില പ്രശ്നങ്ങളുണ്ട്. ദേശീയ ടീമിലേക്ക് തിരിച്ചെത്തിയ പേസര് ഭുവനേശ്വര് കുമാറിന് ആദ്യ രണ്ട് മത്സരങ്ങളില് ഒരു വിക്കറ്റ് പോലും നേടാനായില്ല. നിറം മങ്ങിയ സ്പിന്നര് വാഷിങ്ടണ് സുന്ദറിന് പകരം കുല്ദീപ് യാദവിന് അവസരം കൊടുക്കാനും ടീം മാനേജ്മെന്റ് മുതിര്ന്നേക്കും. കഴിഞ്ഞ അഞ്ച് രാജ്യാന്തര ട്വന്റി20 മത്സരങ്ങളില് സുന്ദറിന് വീഴ്ത്താനായത് മൂന്ന് വിക്കറ്റുകള് മാത്രം. ഫീല്ഡിങ്ങിലും മികവ് കാണിക്കാത്ത താരം കഴിഞ്ഞ മത്സരത്തില് വിന്ഡീസിന്റെ വിജയശില്പ്പി ലെന്ഡല് സിമ്മണ്സിന്റെ ക്യാച്ചും കൈവിട്ടു. കുല്ദീപ് ഫെബ്രുവരിയിലാണ് അവസാനമായി ട്വന്റി20 കളിച്ചത് .
എം.എസ്. ധോണിക്ക് പകരക്കാരനായി ടീമിലെത്തിയ ഋഷഭ് പന്ത് ബാറ്റിങ്ങിലും വിക്കറ്റ് കീപ്പിങ്ങിലും അത്ര മികച്ച ഫോമിലല്ല. കഴിഞ്ഞ മത്സരത്തില് പുറത്താകാതെ 33 റണ്സ് എടുത്തെങ്കിലും വലിയ സ്കോറിലേക്ക് എത്താന് താരത്തിന് സാധിക്കുന്നില്ല. ഒരു ക്യാച്ചും പന്ത് കൈവിട്ടിരുന്നു. വിക്കറ്റിന് പിന്നില് തുടര്ച്ചയായി വരുത്തുന്ന ഇത്തരം പിഴവുകള് പരമ്പരയിലെ അവസാന മത്സരത്തിലെങ്കിലും സഞ്ജുവിന് അവസരം നല്കിയേക്കും.
വിന്ഡീസിന്റെ മുന്നിര മികച്ച ഫോമിലാണ്. ഇവിന് ലൂയിസ്, നിക്കോളാസ് പൂരന്, ഷിമ്രോണ് ഹേറ്റ്മയര്, ലെന്ഡല് സിമ്മണ്സ് എന്നിവരെല്ലാം റണ്സ് കണ്ടെത്തികഴിഞ്ഞു. ഐപിഎല്ലിലൂടെ മുംബൈയുടെ സാഹചര്യം അടുത്തറിയാവുന്ന കീറണ് പൊള്ളാര്ഡ് അടക്കമുള്ള വിന്ഡീസ് താരങ്ങള്ക്ക് ഇന്നത്തെ മത്സരം അത്ര കടുത്തതായിരിക്കില്ല. ബൗളിങ്ങില് ഷെല്ഡണ് കോട്രല്, കെസ്റിക് വില്യംസ്
സ്പിന്നര് ഹെയ്ഡന് വാല്ഷ് എന്നിവരും ഫോമിലാണ്. കഴിഞ്ഞ മത്സരത്തില് മികച്ച തിരിച്ചുവരവ് നടത്തിയതോടെ വിന്ഡീസ് ടീമില് മാറ്റമുണ്ടാകാന് സാധ്യതയില്ല.
ആദ്യ ബാറ്റിങ് തലവേദന
മുംബൈ: വിന്ഡീസിനെതിരായ ട്വന്റി20 പരമ്പരയിലെ നിര്ണായക മത്സരത്തിനിറങ്ങുമ്പോള് ആദ്യം ബാറ്റ് ചെയ്താല് എങ്ങനെ മത്സരം വിജയിക്കണം എന്നതാണ് ഇന്ത്യയുടെ പ്രധാന തലവേദന. ഈ വര്ഷം 15 ട്വന്റി20 മത്സരങ്ങള് കളിച്ചതില് ഏഴെണ്ണത്തിലും ഇന്ത്യ തോറ്റിരുന്നു. അഞ്ച് തവണ ആദ്യം ബാറ്റ് ചെയ്തപ്പോഴാണ് ഇന്ത്യ പരാജയപ്പെട്ടത്.
ആദ്യം ബാറ്റ് ചെയ്താല് പിന്നീട് മത്സരം എങ്ങനെ പ്രതിരോധിക്കണമെന്നറിയാതെ ഇന്ത്യ പലപ്പോഴും കുഴയുകയായിരുന്നു. ഈ വര്ഷം ഏഴുതവണ ഇന്ത്യ ആദ്യം ബാറ്റ് ചെയ്തപ്പോള് വിജയിക്കാനായത് രണ്ട് തവണ മാത്രമാണ്.
ലക്ഷ്യം പരമ്പര: രോഹിത്
മുംബൈ: വരാനിരിക്കുന്ന ലോകകപ്പല്ല ഇപ്പോള് നടക്കുന്ന പരമ്പരയാണ് ടീമിന്റെ പ്രധാന ലക്ഷ്യമെന്ന് രോഹിത് ശര്മ. ലോകകപ്പിന് ഇനിയും സമയമുണ്ട്. വിന്ഡീസിനെതിരായ പരമ്പര നേടുകയാണ് ഇപ്പോഴത്തെ ലക്ഷ്യം. ട്വന്റി20 ലോകകപ്പിന് മുന്നോടിയായി മികച്ച ടീമിനെ ഒരുക്കേണ്ടതുണ്ടെന്ന് ആവര്ത്തിക്കാന് തനിക്ക് താത്പര്യമില്ല. മത്സരങ്ങളും പരമ്പരകളും വിജയിക്കുകയാണ് ഇപ്പോഴത്തെ ലക്ഷ്യമെന്നും രോഹിത് ശര്മ പറഞ്ഞു.
