ഹൈദരാബാദ്: ഹൈദരാബാദില്‍ ഇരുപത്തേഴുകാരിയായ വെറ്ററിനറി ഡോക്ടറെ കൂട്ടമാനഭംഗത്തിന് ഇരയാക്കുകയും പെട്രോള്‍ ഒഴിച്ച് കത്തിച്ചുകൊല്ലുകയും ചെയ്ത കേസിലെ പ്രതികളെ പോലീസ് വെടിവച്ചുകൊന്നു. തെളിവെടുപ്പിനു കൊണ്ടുപോയപ്പോള്‍ പോലീസുകാരില്‍ നിന്ന് തോക്കു തട്ടിയെടുത്ത് വെടിയുതിര്‍ത്ത് രക്ഷപ്പെടാന്‍ ശ്രമിച്ചപ്പോഴാണ് നാലു പ്രതികളേയും വെടിവെച്ചു കൊന്നത്.
ഇന്നലെ പുലര്‍ച്ചെയാണ് കേസിലെ പ്രതികളായ മുഹമ്മദ് ആരിഫ്, ജോളു ശിവ, ജോളു നവീന്‍ കുമാര്‍, ചെന്നകേശവലു എന്നിവര്‍ പോലീസ് വെടിവയ്‌പ്പില്‍ കൊല്ലപ്പെട്ടത്. തെളിവെടുപ്പിനോടനുബന്ധിച്ച് സംഭവം പുനരാവിഷ്‌ക്കരിക്കാന്‍ സംഭവസ്ഥലത്തെത്തിച്ച പ്രതികള്‍ തോക്കു തട്ടിയെടുത്ത് വെടിവയ്‌ക്കുകയും കല്ലെറിഞ്ഞ് ഓടിരക്ഷപ്പെടാന്‍ മുതിരുകയും ചെയ്തതോടെയാണ് തിരിച്ചുവെടിവച്ചതെന്ന് പോലീസ് പറഞ്ഞു. നാലു പ്രതികളും, യുവതി കത്തിച്ചാമ്പലായ സ്ഥലത്തു തന്നെ മരിച്ചുവീണു. പ്രതികളോട് കീഴടങ്ങാന്‍ പലതവണ ആവശ്യപ്പെട്ടിട്ടും അനുസരിച്ചില്ലെന്നും തുടര്‍ന്നാണ് തങ്ങള്‍ വെടിവയ്‌ക്കാന്‍ നിര്‍ബന്ധിതരായതെന്നും സൈബരാബാദ് പോലീസ് കമ്മീഷണര്‍ വി.സി. സജ്ജനാര്‍ വ്യക്തമാക്കി. പ്രതികളുടെ ആക്രമണത്തില്‍ രണ്ട് പോലീസ് ഉദ്യോഗസ്ഥര്‍ക്കും പരിക്കേറ്റു. പുലര്‍ച്ചെ അഞ്ചേമുക്കാല്‍ മുതല്‍ 6.30 വരെയുള്ള സമയത്താണ് ഏറ്റുമുട്ടലുണ്ടായതെന്ന് പോലീസ് വെളിപ്പെടുത്തി.
വ്യാജ ഏറ്റുമുട്ടലാണെന്നും പ്രതികളെ വെറുതേ വെടിവച്ചുകൊല്ലുകയായിരുന്നുവെന്നുമുള്ള വാദങ്ങള്‍ അദ്ദേഹം തള്ളി. യുവതിയെ ഇവരാണ് മാനഭംഗപ്പെടുത്തി കൊന്നതെന്നതിന് തെളിവുകള്‍ ലഭിച്ചിട്ടുണ്ടെന്നും ഇവര്‍ മറ്റു സംസ്ഥാനങ്ങളിലെ പല കേസുകളിലും പ്രതികളാണെന്നും അദ്ദേഹം പറഞ്ഞു.വിവരമറിഞ്ഞ് വെടിവയ്‌പ്പ് നടന്ന സ്ഥലത്തേക്ക് രാവിലെ മുതല്‍ ജനങ്ങള്‍ ഒഴുകിയെത്തുകയാണ്. അനവധി പേര്‍ പോലീസ് നടപടിയെ അനുകൂലിക്കുകയും നീതി ലഭിച്ചതായി പ്രതികരിക്കുകയും ചെയ്തു. എന്നാല്‍ നൂറുകണക്കിനാള്‍ക്കാര്‍ പ്രതികളെ വെടിവച്ചുകൊന്നത് തെറ്റായെന്നും കോടതിയെയും നീതിന്യായ വ്യവസ്ഥയേയും മറികടന്നത് നിയമവിരുദ്ധമായെന്നും പോലീസുകാരെ നിയമ നടപടിക്ക് വിധേയരാക്കണമെന്നും ആവശ്യപ്പെട്ടു.
ഒരു വിഭാഗം ജനങ്ങള്‍ സംഭവത്തോട് വികാരപരമായി പ്രതികരിക്കുകയും പോലീസ് നടപടിയെ സ്വാഗതം ചെയ്യുകയും അതില്‍ സന്തോഷിക്കുകയും ചെയ്തപ്പോള്‍ നിയമവിദഗ്ധരും മറ്റും പോലീസ് നടപടിയെ വിമര്‍ശിക്കുകയും അത് ശരിയല്ലെന്ന് വ്യക്തമാക്കുകയും ചെയ്തു. സംഭവത്തില്‍ കേന്ദ്ര ആഭ്യന്തരമന്ത്രാലയവും ദേശീയ മനുഷ്യാവകാശ കമ്മീഷനും തെലുങ്കാന സര്‍ക്കാരിനോട് വിശദീകരണം തേടിയിട്ടുണ്ട്.
