കാഠ്മണ്ഡു: ദക്ഷിണേഷ്യന് ഗെയിംസില് ഇന്ത്യ മുന്നേറ്റം തുടരുന്നു. അത്ലറ്റിക്സില് ഇന്നലെ ഇന്ത്യ ഒരു സ്വര്ണവും മൂന്ന് വെള്ളിയും നേടി. പുരുഷന്മാരുടെ ട്രിപ്പിള്ജമ്പില് മലയാളി താരം കാര്ത്തിക് ഉണ്ണികൃഷ്ണന് 16.47 മീറ്റര് ചാടിയ പുതിയ മീറ്റ് റെക്കോഡോടെ സ്വര്ണം നേടി. 2016-ല് ഇന്ത്യയുടെ രഞ്ജിത്ത് മഹേശ്വരി സ്ഥാപിച്ച 16.45 മീറ്ററിന്റെ റെക്കോഡാണ് തിരുത്തിയത്. വെള്ളിയും ഇന്ത്യക്ക്. 16.16 മീറ്റര് ചാടി മുഹമ്മദ് സലഹുവാണ് വെള്ളി നേടിയത്.
വനിതകളുടെ 100 മീറ്റര് ഹര്ഡില്സില് മറ്റൊരു മലയാളി താരമായ അപര്ണ റോയ്യാണ് വെള്ളി നേടിയത്. 14.13 സെക്കന്ഡിലാണ് അപര്ണ വെള്ളി നേടിയത്. സീനിയര് തലത്തില് ആദ്യ മത്സരത്തിനിറങ്ങിയാണ് അപര്ണ മെഡല് നേടിയത്. കോഴിക്കോട് കൂടരഞ്ഞി ഓവേലില് റോയി-ടീന ദമ്പതികളുടെ മകളായ അപര്ണ തിരുവനന്തപുരം സായിയിലാണ് പരിശീലനം നടത്തുന്നത്. 13.68 സെക്കന്ഡില് ഫിനിഷ് ചെയ്ത ശ്രീലങ്കയുടെ ലക്ഷിക സുഗന്ധ് സ്വര്ണവും ലങ്കന് താരം തന്നെയായ ഇറെഷാനി സചിപ് വെങ്കലവും നേടി.
പുരുഷന്മാരുടെ 110 മീറ്റര് ഹര്ഡില്സില് 14.37 സെക്കന്ഡില് ഫിനിഷ് ചെയ്ത് സുരേന്ദര് വെള്ളി നേടി. പാക്കിസ്ഥാന്റെ മുഹമ്മദ് നയീം സ്വര്ണവും ശ്രീലങ്കയുടെ റോഷന് ധമിക വെങ്കലവും കരസ്ഥമാക്കി.വനിതകളുടെ 400 മീറ്ററില് പ്രിയയാണ് ഇന്ത്യക്കായി മറ്റൊരു വെള്ളി നേടിയത്. 54.31 സെക്കന്ഡിലാണ് പ്രിയ ഫിനിഷ് ലൈന് കടന്നത്. ശ്രീലങ്കയുടെ ദില്ഷി മഹീഷ സ്വര്ണവും പാക്കിസ്ഥാന്റെ സാഹിബ് ഇ ഇസ്റ വെങ്കലവും സ്വന്തമാക്കി. പുരുഷ വിഭാഗത്തില് ജീവന് 47.42 സെക്കന്ഡില് വെങ്കലം നേടി. സ്വര്ണവും വെള്ളിയും ശ്രീലങ്കന് താരങ്ങള്ക്കാണ്.വനിതകളുടെ ട്രിപ്പിള്ജമ്പില് 12.77 മീറ്റര് ചാടി ഭൈരബി റോയ് വെങ്കലം കരസ്ഥമാക്കി. സ്വര്ണവും വെള്ളിയും ശ്രീലങ്കയ്ക്ക്.
