തിരുവനന്തപുരം: സാങ്കേതിക സര്വ്വകലാശാല മാര്ക്ക് വിവാദം പുകയുമ്പോള് ഉന്നത് വിദ്യാഭ്യാസ മന്ത്രി കെ.ടി. ജലീല് വിദേശത്തേക്ക് പറക്കാനുള്ള ഒരുക്കത്തില്. മുഖ്യമന്ത്രി പിണറായി വിജയന്റെ വിദേശയാത്രക്കെതിരേയും പ്രതിഷേധം ശക്തമാണ്. അപ്പോഴാണ് കെ.ടി. ജലീലും വിദേശത്തേയ്ക്ക് പോകുന്നത്.
ഈ മാസം 17 മുതല് നാലുദിവസത്തെ മാലദ്വീപ് സന്ദര്ശനത്തിനാണ് ജലീല് തയ്യാറെടുക്കുന്നത്. ഉന്നത വിദ്യാഭ്യാസരംഗത്തെ പരിഷ്കരണവും, കേരളവും മാലദ്വീപും തമ്മില് ഉന്നത വിദ്യാഭ്യാസ രംഗത്തെ സഹകരണം വര്ധിപ്പിക്കലുമാണ് യാത്രയുടെ ലക്ഷ്യം. മന്ത്രിക്ക് പുറമേ ഉന്നത വിദ്യാഭ്യാസ വകുപ്പ് പ്രിന്സിപ്പല് സെക്രട്ടറി ഉഷ ടൈറ്റസ്, എപിജെ അബ്ദുള്കലാം സര്വകലാശാല പ്രോ വൈസ് ചാന്സലര് അയൂബ്, എഐസിടിഇ ഡയറക്ടര് രമേഷ് ഉണ്ണികൃഷ്ണന്, കമ്യൂണിറ്റി സ്കില്സ് ഡയറക്ടര് ടി വി വിനോദ് എന്നിവരാണ് സംഘത്തിലുള്ളത്.
കേരളം കടുത്ത സാമ്പത്തിക പ്രതിസന്ധിയിലെന്ന് ധനമന്ത്രി തോമസ് ഐസക്ക് ആവര്ത്തിക്കുന്നതിനിടെയാണ് മന്ത്രിയുടെയും വിദേശയാത്ര. സാമ്പത്തിക പ്രതിസന്ധി പിടിച്ചു നിര്ത്തുന്നതിനായി സര്ക്കാര് നല്കിവരുന്ന സേവനങ്ങള്ക്കുള്ള ഫീസ് 10 ശതമാനം വര്ധിപ്പിക്കാനും ധനവകുപ്പ് ശുപാര്ശ ചെയ്തിരിക്കുകയാണ്. അഞ്ച് ശതമാനം വീതം രണ്ടുതവണ വര്ധിപ്പിച്ചതിന് പിന്നാലെയാണ് അടുത്തതും കൂടി നിര്ദ്ദേശിച്ചിരിക്കുന്നത്. ബജറ്റിനുശേഷം ഇതുസംബന്ധിച്ച് സര്ക്കാര് ഉത്തരവ് പുറത്തിറക്കും.
അതേസമയം കേന്ദ്ര വിദേശകാര്യ മന്ത്രാലയത്തിന്റെ അനുമതി കാത്തിരിക്കുകയാണ്. അത് കിട്ടിയാല് ഉടന് കെ.ടി. ജലീല് പരിവാരങ്ങളുമായി മാലിദ്വീപിലേക്ക് പറക്കുമെന്നും സര്ക്കാര് വൃത്തങ്ങള് അറിയിച്ചു. എന്നാല് ഉഷ ടൈറ്റസ് നിലവില് മുഖ്യമന്ത്രി പിണറായി വിജയനും മന്ത്രിമാരായ ഇ.പി. ജയരാജനും എ.കെ. ശശീന്ദ്രനും ചീഫ് സെക്രട്ടറി ടോം ജോസും അടങ്ങുന്ന സംഘത്തിന്റെ ജപ്പാന്, കൊറിയ വിദേശ സംഘത്തിനൊപ്പമാണുള്ളത്. ഇവര് തിരിച്ചെത്തിയ ഉടനാണ് അടുത്തയാത്ര ഒരുക്കിയിരിക്കുന്നത്.
സംസ്ഥാനത്തെ മന്ത്രിമാര്ക്ക് താത്പര്യം വിദേശയാത്രകളില് മാത്രമാണെന്ന് മുഖ്യമന്ത്രിയുടേയും ആരോഗ്യ മന്ത്രിയുടേയും വിദേശ യാത്രയെ ഹൈക്കോടതി വിമര്ശിച്ചിരുന്നു. വാക്കാലായിരുന്നു കോടതിയുടെ പരാമര്ശങ്ങള്.
