തിരുവനന്തപുരം: കെഎസ്ആര്ടിസിയില് ശമ്പള പ്രതിസന്ധി. കടുത്ത സാമ്പത്തിക ക്ലേശത്തില് നട്ടംതിരിയുന്ന കെഎസ്ആര്ടിസിയെ സഹായിക്കുന്നതില് നിന്ന് സര്ക്കാരും കൈമലര്ത്തിയതോടെ ജീവനക്കാരുടെ നവംബര് മാസത്തെ ശമ്പളം അനിശ്ചിതത്വത്തിലായി. നിലവില് ജീവനക്കാര്ക്ക് 30ന് ശമ്പളം ലഭിക്കേണ്ടതായിരുന്നു. എന്നാല്, കൂലി നല്കാന് കോര്പ്പറേഷന്റെ കൈയില് ഒന്നുമില്ല. ഒക്ടോബര് മാസത്തെ ശമ്പളം നല്കാന് തന്നെ കെഎസ്ആര്ടിസി നന്നേ ബുദ്ധിമുട്ടിയിരുന്നു.
സര്ക്കാര് സഹായിക്കാതെ കെഎസ്ആര്ടിസി ജീവനക്കാര്ക്ക് ശമ്പളം നല്കാന് കഴിയില്ലെന്ന് കഴിഞ്ഞ മാസം ഗതാഗതമന്ത്രി എ.കെ. ശശീന്ദ്രന് സര്ക്കാരിനെ അറിയിച്ചിരുന്നു. 39 കോടി രൂപയാണ് സര്ക്കാരിനോട് ആവശ്യപ്പെട്ടത്. എന്നാല്, കെഎസ്ആര്ടിസിയോട് സര്ക്കാര് അനുഭാവപൂര്വമായ സമീപനമല്ല സ്വീകരിച്ചത്. ഗത്യന്തരമില്ലാതെ കളക്ഷന് തുക എടുത്താണ് 15നും 28നുമായി ജീവനക്കാരുടെ ഒക്ടോബര് മാസത്തെ ശമ്പളം രണ്ടുഘട്ടമായി നല്കി തീര്ത്തത്. ഈ മാസം വിനിയോഗിക്കേണ്ട കളക്ഷന് തുക കഴിഞ്ഞ മാസം ശമ്പളത്തിനായി ചെലവഴിച്ചതിനാല് നവംബര് മാസത്തെ ശമ്പളം എങ്ങനെ നല്കുമെന്ന ആശങ്കയിലാണ് കെഎസ്ആര്ടിസി.
മുഖ്യമന്ത്രിയെയും ധനമന്ത്രിയെയും നേരില്ക്കണ്ട് എ.കെ. ശശീന്ദ്രന് പ്രതിസന്ധി ബോധ്യപ്പെടുത്തിയിട്ടും നടപടിയുണ്ടായില്ല. സര്ക്കാരിന്റെ ഭാഗത്തുനിന്ന് അടിയന്തര ഇടപെടല് ഉണ്ടായാല് മാത്രമെ ജീവനക്കാരുടെ ശമ്പളം ഉള്പ്പെടെ നല്കി സ്ഥാപനത്തിന് മുന്നോട്ടു പോകാനാകു. കെഎസ്ടി സംഘ് ഉള്പ്പടെയുള്ള വിവിധ യൂണിയനുകള് ശമ്പള പ്രതിസന്ധിയെ ചൊല്ലി സമരമുഖത്താണ്. കെഎസ്ആര്ടിസിയെ സംരക്ഷിക്കണമെന്നാവശ്യപ്പെട്ട് ബിഎംഎസ് സംസ്ഥാന സെക്രട്ടറി അജിത്ത്, കെഎസ്ടി സംഘ് സംസ്ഥാന പ്രസിഡന്റ് രാജേഷ് എന്നിവരുടെ നേതൃത്വത്തില് മുഖ്യമന്ത്രിയെ നേരില്ക്കണ്ട് നിവേദനം നല്കിയിരുന്നു. ഭരണ, പ്രതിപക്ഷ സംഘടനകള് വിഷയത്തില് സംസ്ഥാന സര്ക്കര് ഇടപെടണമെന്ന് ആവശ്യപ്പെട്ടിട്ടും ഇതുവരെ പിണറായി വിഷയത്തില് ഇടപെടാന് തയാറായില്ല.
സൂപ്പര് ക്ലാസ് ബസുകളുടെ കാലാവധി കൂട്ടണമെന്ന കെഎസ്ആര്ടിസിയുടെ ആവശ്യം ഗതാഗത വകുപ്പും തള്ളിയതോടെ കൂടുതല് ബസുകള് വാടകയ്ക്കെടുക്കാന് കെഎസ്ആര്ടിസി തീരുമാനിച്ചു. ഇത് ബോര്ഡിനെ കൂടുതല് പ്രതിസന്ധിയിലാക്കും. 50 എസി ബസുകള് വാടകയ്ക്കെടുക്കാനാണ് നിലവില് ടെന്ഡര് ക്ഷണിച്ചത്. 250 വാടക ഇലക്ട്രിക് ബസുകള്ക്കു ടെന്ഡര് വിളിച്ചതിനു പുറമെയാണിത്. നിലവിലെ ഷെഡ്യൂളുകള് സാമ്പത്തിക നഷ്ടത്തിന്റെ പേരില് നിര്ത്തലാക്കുമ്പോഴാണ് വാടകയ്ക്ക് ബസെടുത്ത് ഓടാനുള്ള കോര്പ്പറേഷന്റെ തീരുമാനം.
