മുംബൈ: ഉദ്ദവ് താക്കറെയുടെ സത്യപ്രതിജ്ഞാ ചടങ്ങില് വ്യാപക പോക്കറ്റടി. പരാതിയുമായി നിരവധിപേര് പോലീസ് സ്റ്റേഷനിലെത്തി. പാര്ട്ടിപ്രവര്ത്തകരുള്പ്പെടെ നിരവധിപേര് പണവും സ്വര്ണാഭരണങ്ങളും മൊബൈലുകളും നഷ്ടപ്പെട്ടതായി പരാതിപ്പെട്ടു. ഐപിസി 379, 34 വകുപ്പ് പ്രകാരം പരാതികളുടെ അടിസ്ഥാനത്തില് പോലീസ് കേസ് രജിസ്റ്റര് ചെയ്തിട്ടുണ്ട്. മോഷണവുമായി ബന്ധപ്പെട്ട് രണ്ട് പേരെ അറസ്റ്റ് ചെയ്തിട്ടുള്ളതായും കേസില് കൂടുതല് അന്വേഷണം തുടരുകയാണെന്നും മുംബൈ ഡിഎസ്പി നിയാറ്റി താക്കറെ പറഞ്ഞു.സത്യപ്രതിജ്ഞാ ചടങ്ങില് സമ്പൂര്ണ്ണ സുരക്ഷ ഉറപ്പുവരുത്തുന്നതിനായി രണ്ടായിരത്തിലധികം പോലീസുകാരെ വിന്യസിക്കുകയും വേദിയിലെ ഒന്നിലധികം സ്ഥലങ്ങളില് സിസിടിവി ക്യാമറകള് സ്ഥാപിക്കുകയും ചെയ്തിരുന്നതാണ്.
ശിവസേനയിലെ ഏക് നാഥ് ഷിന്ഡെ, സുഭാഷ് ദേശായ്, എന് സിപിയിലെ ഛഗന് ഭുജ്ബല്, ജയന്ത് പാട്ടീല്, കോണ്ഗ്രസിലെ ബാലാ സാഹെബ് തൊറാത്ത്, ഡോ. നിതിന് റാവത്ത് എന്നിവരും മന്ത്രിമാരായി സത്യപ്രതിജ്ഞ ചെയ്തിരുന്നു. മഹാരാഷ്ട്ര ഗവര്ണര് കെ.ബി. കോശിയാരിയാണ് നാളെ സര്ക്കാര് വിശ്വാസവോട്ട് തേടാന് നിര്ദേശിച്ചത്. ഇതിന്റെ ഭാഗമായി എന്സിപി എംഎല്എ ദിലീസ് വാല്സെ പട്ടീലിനെ പ്രോടേം സ്പീക്കറായി നിയമിച്ചു.
ശിവസേന സ്ഥാപക നേതാവ് ബാല് താക്കറെയെ സംസ്കരിച്ച ശിവജി പാര്ക്കില് നടന്ന സത്യപ്രതിജ്ഞ ചടങ്ങില് രാഷ്ട്രീയരംഗത്തെ പ്രമുഖരായ ബിജെപി നേതാവും മുന് മുഖ്യമന്ത്രിയുമായ ദേവേന്ദ്ര ഫഡ് നാവിസ്, കോണ്ഗ്രസ് നേതാക്കളായ അഹമ്മദ് പട്ടേല്, മല്ലികാര്ജുന് ഖാര്ഗെ, കപില് സിബല്, മധ്യപ്രദേശ് മുഖ്യമന്ത്രി കമല്നാഥ്, എന്സിപി അധ്യക്ഷന് ശരദ് പവാര്, എംഎന്എസ് നേതാവും ഉദ്ദവിന്റെ പിതൃസഹോദര പുത്രനുമായ രാജ് താക്കറെ, ഡിഎംകെ അധ്യക്ഷന് എംകെ സ്റ്റാലിന് എന്നിവര്ക്കൊപ്പം വ്യവസായി മുകേഷ് അംബാനി, ഭാര്യ നിത അംബാനി തുടങ്ങിയവര് പങ്കെടുത്തിരുന്നു. എന്നാല് എഐസിസി ഇടക്കാല പ്രസിഡന്റ് സോണിയ ഗാന്ധി, മുന് പ്രസിഡന്റ് രാഹുല് ഗാന്ധി, മുന് പ്രധാനമന്ത്രി ഡോ. മന്മോഹന് സിങ് എന്നിവര് പങ്കെടുത്തില്ല.
