തിരുവനന്തപുരം : സിനിമാ ചിത്രീകരണത്തിന് തടസ്സമാകും വിധത്തില് ഷെയ്ന് നിഗം തലമൊട്ടയടിച്ചത് തോന്നിയവാസമാണെന്ന് ഗണേഷ് കുമാര്. ഇത്തരത്തില് അഹങ്കരിക്കുന്ന നടപടികള് ഉണ്ടായാല് ഷെയ്ന് മലയാള സിനിമയില് നിന്ന് പുറത്തുപോകുമെന്നും അദ്ദേഹം പറഞ്ഞു.
അച്ചടക്കമില്ലാത്തവരെ താരസംഘടനയായ അമ്മ പിന്തുണയ്ക്കില്ല. പുതുമുഖ സംവിധായകനെ കണ്ണീരില് ആഴ്ത്തുന്ന നടപടിയാണ് ഷെയ്നിന്റെ ഭാഗത്തു നിന്നും ഉണ്ടായിരിക്കുന്നതെന്നും ഗണേഷ് കുമാര് കുറ്റപ്പെടുത്തി. അതേസമയം സിനിമാ സെറ്റുകളില് ലഹരി ഉപയോഗം കൂടുതലാണ്. എക്സൈസും പോലീസും ഇതുസംബന്ധിച്ച് അന്വേഷിക്കേണ്ടതാണെന്നും അദ്ദേഹം ആവശ്യപ്പെട്ടു.
അഭിനയിച്ച് കൊണ്ടിരുന്ന ചിത്രങ്ങളോട് നിസഹകരിച്ച ഷെയ്ന് നിഗത്തിന്റെ നിലപാട് അംഗീകരിക്കാന് കഴിയില്ലെന്ന് ഫെഫ്ക യൂണിയന് ജനറല് സെക്രട്ടറി ബി ഉണ്ണികൃഷണനും ഷെയ്നിനെതിരെ രംഗത്ത് എത്തി. പ്രശ്നത്തിലുടനീളം ഷെയ്ന് തികച്ചും അപക്വമായാണ് പെരുമാറിയത്. പണം വാങ്ങിയ ചിത്രങ്ങള് നിര്മാതാക്കളുമായി സഹകരിച്ച് പൂര്ത്തികരിച്ച് കൊടുക്കാന് അദ്ദേഹം തയ്യാറാകണമെന്നും ബി ഉണ്ണികൃഷ്ണന് കൂട്ടിച്ചേര്ത്തു.
