ന്യൂദല്ഹി: വാളയാറില് ദളിത് സഹോദരിമാരെ പീഡിപ്പിച്ച് കൊലപ്പെടുത്തിയ കേസില് സംസ്ഥാന സര്ക്കാര് നല്കിയ വിശദീകരണം തൃപ്തികരമല്ലെന്ന് ദേശീയ പട്ടിക ജാതി കമ്മീഷന്. വിഷയം കൈകാര്യം ചെയ്തതില് സര്ക്കാരും പബ്ലിക് പ്രോസിക്യൂട്ടറും പരാജയപ്പെട്ടുവെന്നും കമ്മീഷന് ഉപാധ്യക്ഷന് എല്. മുരുകന് പറഞ്ഞു.
ചീഫ് സെക്രട്ടറിക്ക് വേണ്ടി പ്രിന്സിപ്പല് സെക്രട്ടറി സഞ്ജയ് ഗാര്ഗും ഡിജിപിക്ക് വേണ്ടി ക്രമസമാധാന ചുമതലയുള്ള എഡിജിപി ഷേക്ക് ദര്വേഷ് സാഹിബും അന്വേഷണ ഉദ്യോഗസ്ഥനായിരുന്ന എം.ജെ. സോജനും ഇന്നലെ കമ്മീഷന് മുന്പാകെ ഹാജരായി. വാളയാര് സംഭവത്തില് കൂടുതല് വിവരങ്ങള് കമ്മീഷന് ആവശ്യപ്പെട്ടു. മെഡിക്കല് റിപ്പോര്ട്ടുകള് സമര്പ്പിക്കാന് മെഡിക്കല് ഓഫീസര്മാര്ക്ക് നോട്ടീസ് അയയ്ക്കും.
അടുത്ത സിറ്റിങ് ദിനമായ 21ന് ആഭ്യന്തര സെക്രട്ടറി, രണ്ട് മെഡിക്കല് ഓഫീസര്മാര്, സസ്പെന്ഡ് ചെയ്യപ്പെട്ട എസ്ഐ, സിഐ എന്നിവര് ഹാജരാകണം. സംസ്ഥാന സര്ക്കാരിന്റെ വീഴ്ചയെ തുടര്ന്ന് പ്രതികളെ കോടതി വെറുതെവിട്ടിരുന്നു. ഇതിനെതിരെ പ്രതിഷേധമുയര്ന്നപ്പോള് ഒക്ടോബര് 29ന് മുരുകന് വാളയാറിലെ പെണ്കുട്ടികളുടെ വീട് സന്ദര്ശിച്ചിരുന്നു. തുടര്ന്ന് ചീഫ് സെക്രട്ടറിയും ഡിജിപിയും ദല്ഹിയിലെ ആസ്ഥാനത്തെത്തി വിശദീകരണം നല്കണമെന്നും ആവശ്യപ്പെട്ടു.
