തിരുവനന്തപുരം: ഫീസ് വര്ദ്ധനയ്ക്കെതിരെ ജെഎന്യുവില് രണ്ടാഴ്ചയിലധികമായി നടക്കുന്ന സമരത്തില് എബിവിപിയും പങ്കെടുക്കുന്നുണ്ടെന്നും മറിച്ചുള്ള വാര്ത്തകള് വസ്തുതാ വിരുദ്ധമാണെന്നും എബിവിപി ദേശീയ സെക്രട്ടറി ശ്യാം രാജ്. എബിവിപിയുടെ നാളിതുവരെയുള്ള സമരങ്ങളും സംഘടനാ നിലപാടുകളും വ്യക്തമാക്കുന്ന രേഖകള് പങ്കുവച്ച് കൊണ്ടാണ് ശ്യാം രാജ് ഫെയ്സ്ബുക്കിലൂടെ ജെഎന്യു വിഷയത്തിലെ നിലപാട് വ്യക്തമാക്കിയത്.
വിഷയത്തില്, ആശയങ്ങള്ക്ക് അതീതമായി വിദ്യാര്ത്ഥികള് ഒരുമിച്ചു നില്ക്കണമെന്ന് തന്നെയാണ് എബിവിപിയുടെ നിലപാട്. എല്ലാ വിദ്യാര്ഥി സംഘടനകളേയും ഉള്പ്പെടുത്തി ഒരു കോര്ഡിനേഷന് കമ്മിറ്റി രൂപീകരിക്കണമെന്ന് ആദ്യം ആവശ്യപ്പെട്ടതും എബിവിപി തന്നെയാണ്. എബിവിപി ഒറ്റയ്ക്കും, ജെഎന്യു വിദ്യാര്ത്ഥി യൂണിയനോടു കൂടി ചേര്ന്നും സമരങ്ങള് ചെയ്തു വരുന്നു. യുജിസി ഓഫീസിലേക്കും എബിവിപി സമരം ചെയ്തിരുന്നെന്ന് ശ്യാം രാജ് ചൂണ്ടിക്കാട്ടുന്നു.
തങ്ങളുടെ സമരം യൂണിവേഴ്സിസിറ്റിക്കെതിരെ ആണെന്നും അതുകൊണ്ട് തന്നെയാണ് ഇന്ന് കോണ്വൊക്കേഷന് സമയത്ത് നടന്ന സമര പരിപാടിയില് നിന്നും എബിവിപി മാറി നിന്നതെന്നും അദ്ദേഹം വ്യക്തമാക്കി. ഈ സമരവുമായി ബന്ധപ്പെട്ട്, ഇടത് വിദ്യാര്ഥി സംഘടനകള് നയിക്കുന്ന ജെഎന്യു വിദ്യാര്ഥി യൂണിയനുമായി ചില അഭിപ്രായ വ്യത്യാസങ്ങള് ഉണ്ടെന്നത് യാഥാര്ഥ്യമാണ്. ഇപ്പോള് അത് വിവരിക്കേണ്ട സന്ദര്ഭമല്ലെന്ന ഉത്തമ ബോധ്യമുള്ളതു കൊണ്ട്, സമരത്തെക്കുറിച്ച് മാത്രം സൂചിപ്പിക്കുന്നെന്നും ശ്യാം രാജ് വ്യക്തമാക്കി.
