കോഴിക്കോട്: മാവോയിസ്റ്റ് ബന്ധത്തില് യുഎപിഎ ചുമത്തി അറസ്റ്റിലായ സിപിഎം ബ്രാഞ്ച് കമ്മിറ്റി അംഗങ്ങള്ക്കു മേല് കുരുക്ക് മുറുകുന്നു. അറസ്റ്റിലായ പ്രതികള്ക്ക് ഇതര സംസ്ഥാനങ്ങളിലെ മാവോയിസ്റ്റ് നേതാക്കളുമായി ബന്ധമുണ്ടെന്ന തെളിവുകള് ലഭിച്ചതോടെ അയല് സംസ്ഥാനങ്ങളിലെ മാവോയിസ്റ്റ് വിരുദ്ധ സേനയും സമാന്തര അന്വേഷണ തുടങ്ങി. അറസ്റ്റിലായ അലന് ഷുഹൈബും താഹ ഫസലും അയല് സംസ്ഥാനങ്ങളിലേക്ക് നിരവധി യാത്രകള് നടത്തിയതിന്റെ തെളിവുകള് അന്വേഷണ സംഘത്തിന് ലഭിച്ചിട്ടുണ്ട്. ഇതേപ്പറ്റി കൂടുതല് വിവരങ്ങള് പ്രതികള് വെളിപ്പെടുത്തിയിട്ടില്ല. ഇതേത്തുടര്ന്ന് ഇതര സംസ്ഥാനങ്ങളിലെ മാവോയിസ്റ്റ് ബന്ധത്തെപറ്റി അന്വേഷിക്കാന് മറ്റു സംസ്ഥാനങ്ങളിലെ മാവോയിസ്റ്റ് വിരുദ്ധ സേനാ ഉദ്യോഗസ്ഥര് കോഴിക്കോട് എത്തും. കേരള പോലീസ് ശേഖരിച്ച തെളിവുകള് ഇവര് പരിശോധിക്കുന്നതോടൊപ്പം പ്രതികളെ കസ്റ്റഡിയില് വാങ്ങുമ്പോള് തങ്ങളുടെകൂടി സാന്നിധ്യത്തില് ചോദ്യംചെയ്യണമെന്നും ഇവര് കേരള പോലീസിനോട് ആവശ്യപ്പെട്ടിട്ടുണ്ട്.
അതേസമയം, അറസ്റ്റിലായ അലന് ആറു മൊബൈല് ഫോണുകള് ഉപയോഗിച്ചിരുന്നെന്നാണ് സൂചന. ഒരു ഫോണ് മാത്രമാണ് ഇപ്പോള് പോലീസ് പിടിച്ചെടുത്തത്. മറ്റു ഫോണുകള്ക്കായി അന്വേഷണം തുടരുകയാണ്. ഈ ഫോണുകളുടെ ഉപയോഗം സംബന്ധിച്ചുള്ള വിവരങ്ങളും പോലീസ് ശേഖരിക്കുന്നുണ്ട്. അലനും താഹയ്ക്കും ഒപ്പമുണ്ടായിരുന്ന മൂന്നാമത്തെ ആളെ കണ്ടെത്താന് മറ്റു സംസ്ഥാനങ്ങളിലടക്കം അന്വേഷണം നടന്നുകൊണ്ടിരിക്കുകയാണെന്നും പോലീസ് പറയുന്നു.വിദ്യാര്ഥികളുടെ മാവോയിസ്റ്റ് ബന്ധം വ്യക്തമാക്കുന്ന വ്യക്തമായ തെളിവുകള് തങ്ങള്ക്ക് ലഭിച്ചിട്ടുണ്ടെന്ന് പോലീസ് നേരത്തെ വ്യക്തമാക്കിയിരുന്നു. ഈ തെളിവുകള് പരിശോധിക്കാനാണ് മറ്റു സംസ്ഥാനങ്ങളില്നിന്ന് അന്വേഷണ സംഘം എത്തുന്നതെന്നാണ് റിപ്പോര്ട്ട്. അറസ്റ്റിലായ അലന് മറ്റൊരു സംസ്ഥാനത്തുനിന്നുള്ള മാവോയിസ്റ്റ് നേതാക്കളുമായി പാലക്കാട് വച്ചു കൂടിക്കാഴ്ച നടത്തിയെന്നു തെളിഞ്ഞിരുന്നു. ഇതാരണെന്നു വ്യക്തമായിട്ടില്ല.
